ডিব্ৰুগড়ত মটক পৰম্পৰাৰে এক ইশ্বৰবাদৰ শৰণাপন্ন হ’ল অৰ্ধ শতাধিক যুৱক-যুৱতী

ডিব্ৰুগড় জিলাৰ লাহোৱাল সমষ্টিৰ ইকৰাতলী খনিকৰ গাঁওত আজি অৰ্ধশতাধিক পুৰুষ আৰু মহিলাই মটক সমাজৰ পৰম্পৰা আৰু ৰিতি-নীতিৰে এক ইশ্বৰ ধৰ্মত ইশ্বৰৰ ওচৰত শৰণ গ্ৰহণ কৰে।

ঐতিহাসিক মায়ামৰ মদাৰখাত আৰু দিনজয় সত্ৰৰ সত্ৰাধিকাৰে ভক্তপ্ৰাণ লোকসকলক শৰণ দান কৰে।

ন শৰণীয়া সকলক গায়ন-বায়নেৰে শৰণ কাৰ্য্যৰ বাবে চেঁচা নদীলৈ দীঘলীয়া শাৰীৰে সহস্ৰাধিক ৰাইজে আদৰি নিয়ে। মটক সকলে পবিত্ৰ হিচাপে মানি অহা চেঁচা নদীত স্নান কৰি শৰণ কাৰ্য্যৰ বিভিন্ন নীতি-নিয়ম আৰম্ভ কৰা হয়।

আজিৰ শৰণ কাৰ্য্যসূচীত মদাৰখাত যুৱ সত্ৰাধিকাৰ শ্ৰী শ্ৰী বৈষ্ণবানন্দ গোস্বামী আৰু দিনজয় সত্ৰৰ মনোজ গোস্বামী, সদৌ অমস মটক যুৱ-ছাত্ৰ সন্মিলনৰ উপ-সভাপতি অজয় গগৈৰ লগতে কেইবাখনো গাঁৱৰ নামঘৰীয়া আৰু স্থানীয় যুৱক-যুৱতী, পুৰুষ-মহিলা উপস্থিত থাকে।

শৰণ লাভ কৰাৰ পাছত যুৱক-যুৱতী সকলে সত্ৰাধিকাৰ প্ৰভূৰ আদেশ অনুসৰি প্ৰভু ভগৱন্তৰ সেৱা কৰি যাব বুলি মন্তব্য কৰে।