মহানুভৱতাৰ নিদৰ্শন : এটা মচজিদক পৰিবৰ্তন কৰা হ’ল ক’ভিড কেয়াৰ চেণ্টাৰলৈ, ক’ত?

ক’ভিড-১৯ৰ বিৰোধী যুঁজত মহানুভৱতাৰ পৰিচয় দাঙি ধৰিলে কেৰালাৰ এটা মচজিদে।

থ্ৰিচ্ছুৰ চহৰৰ মালা অঞ্চলৰ ইছলামিক চাৰ্ভিছ ট্ৰাষ্ট জামা মচজিদটোক ক’ভিড কেয়াৰ চেণ্টাৰ হিচাপে পৰিবৰ্তিত কৰা হৈছে।

মচজিদৰ কৰ্তৃপক্ষই এই উপলক্ষে পবিত্ৰ ৰমজান মাহৰ উপাসনাসমূহ আন স্থানলৈ স্থানান্তৰিত কৰিছে।

৫০খন বিচনাৰে ক’ভিড কেয়াৰ চেণ্টাৰটোত এজন ডাক্তৰ আৰু নাৰ্চ, দুজন স্বেচ্ছাসেৱক আৰু এজন কেয়াৰটেকাৰ থাকিব।

ইছলামিক চাৰ্ভিছ ট্ৰাষ্টৰ এগৰাকী তত্বাৱধায়ক জামাল ভিএছে কয় যে ৰাজহুৱা সেৱা হৈছে এটা উপাসনা।

এই সম্পৰ্কে স্থানীয় মালা পঞ্চায়তৰ সভাপতি সিন্ধু অশোকে কয় যে পঞ্চায়তটোত ৩০০ টা পজিটিভ কেচ পোৱা গৈছে।

যিহেতু ৰোগীসকলৰ ঘৰত পৰ্যাপ্ত সা-সুবিধা নাই, সেয়ে ইছলামিক চাৰ্ভিছ ট্ৰাষ্টে মচজিদটোক ক’ভিড কেয়াৰ চেণ্টাৰ হিচাপে আগবঢ়াই দিছে বুলি তেওঁ জানিবলৈ দিছে।

চেণ্টাৰটোত ৰোগীসকললৈ খাদ্য সামগ্ৰী পঞ্চায়তৰ তৰফৰ পৰা যোগান ধৰা হ’ব।

তদুপৰি ইছলামিক চাৰ্ভিছ ট্ৰাষ্টে চেণ্টাৰটোলৈ এখন এম্বুলেঞ্চো যোগান ধৰিছে বুলি তেওঁ কয়।