নিজ পুত্ৰক দাৰে ঘপিয়াই হত্যাৰ চেষ্টা; মাতৃক গ্ৰেপ্তাৰ

নিজৰ পুত্ৰক হত্যাৰ অপচেষ্টা চলোৱাৰ অভিযোগত আজি ত্ৰিপুৰাত এগৰাকী মহিলাক গ্ৰেপ্তাৰ কৰা হয়।

এই চাঞ্চল্যকৰ ঘটনা সংঘটিত হয় পশ্চিম ত্ৰিপুৰা জিলাৰ বল্লভপুৰ গাঁৱত।

গ্ৰেপ্তাৰ কৰা মহিলা গৰাকীৰ নাম মমতা ভৌমিক, বয়স ৫০ বছৰ।

জিলাখনৰ আমতলি আৰক্ষী খানাৰ ভাৰপ্ৰাপ্ত বিষয়া সিদ্ধাৰ্থ কৰে জানিবলৈ দিয়া মতে অঞ্চলটোৰ এগৰাকী মহিলাই নিজৰ পুত্ৰক দাৰে ঘপিয়াই গুৰুতৰভাৱে আহত কৰা বুলি আৰক্ষীলৈ খবৰ আহিছিল।

পিছত আৰক্ষীৰ লোক ঘটনাস্থলীত উপস্থিত হৈ আঘাতপ্ৰাপ্ত ল’ৰাজনক উদ্ধাৰ কৰাৰ লগতে মহিলা গৰাকীক গ্ৰেপ্তাৰ কৰে।

আহত ল’ৰাজনৰ নাম পৰানাজি ভৌমিক, তেওঁক চিকিৎসালয়ত ভৰ্তি কৰোৱা হয়।

স্থানীয় লোকৰ মতে পাৰিবাৰিক কন্দলক কেন্দ্ৰ কৰিয়েই এই ঘটনা সংঘটিত হয়। তেওঁলোকৰ মতে যোৱা কেইবাদিন ধৰি ঘৰখনত পাৰিবাৰিক অশান্তিয়ে বিৰাজ কৰি আছিল।

ঘটনা সম্পৰ্কত আমতলি আৰক্ষী থানাত মমতা ভৌমিকৰ বিৰুদ্ধে এক গোচৰ ৰুজু কৰা হৈছে বুলি আৰক্ষীৰ সূত্ৰই জানিবলৈ দিয়ে।