ফিল্মফেয়াৰ এৱাৰ্ড অনুষ্ঠানত সাংসদ কুইন ওজা আৰু ত্ৰিপুৰাৰ মুখ্য মন্ত্ৰীৰ পত্নীও অপমানিত

গুৱাহাটীত প্ৰথমবাৰৰ বাবে অনুষ্ঠিত ফিল্মফেয়াৰ এৱাৰ্ড অনুষ্ঠানত সাংসদ বিশ্বজিৎ দৈমাৰী আৰু তেওঁৰ পৰিয়ালটো অপমানিত হোৱাৰ দৰে সাংসদ কুইন ওজা আৰু ত্ৰিপুৰাৰ মুখ্য মন্ত্ৰীৰ পত্নীও একেই পৰিস্থিতিৰ সন্মুখীন হোৱা বুলি খবৰ পোৱা গৈছে।

দৈনিক জনমভূমি নামৰ কাকতখনে এই সম্পৰ্কীয় এটা বাতৰি দি কৈছে যে আয়োজক টাইমছ অব ইণ্ডিয়া গ্ৰুপৰ কৰ্মকৰ্তাই অসমৰ দুজন সাংসদৰ উপৰি ত্ৰিপুৰাৰ মুখ্য মন্ত্ৰীৰ পত্নীক অপমানিত কৰে।

জানিব পৰামতে, অসম চৰকাৰৰ সহযোগত অনুষ্ঠানটো আয়োজন কৰা টাইমছ অব ইণ্ডিয়া গ্ৰুপৰ কৰ্মকৰ্তাই সাংসদ কুইন ওজাক তেওঁ বহি থকা আসন তেওঁৰ নহয় বুলি তাৰ পৰা উঠাই দিয়ে। গুৱাহাটী সমষ্টিৰ সাংসদগৰাকী পিছত বেলেগ আসনলৈ গৈ বহিব লগীয়া হয়।

আনহাতে ত্ৰিপুৰাৰ মুখ্য মন্ত্ৰীৰ পত্নীকো নিজৰ আসনৰ পৰা বলপূৰ্বক উঠাই পিছলৈ নিয়া হয়।

অৱশ্যে পিছত চিনাকি কৰি দিয়াত তেওঁক পুনৰ আগৰ আসনত বহিবলৈ দিয়া হয়।

আনহাতে এই ঘটনাক লৈ সাংসদ বিশ্বজিৎ দৈমাৰীয়ে সংবাদ মাধ্যমৰ আগত তীব্ৰ অসন্তুষ্টি প্ৰকাশ কৰাৰ বিপৰীতে সাংসদ ৰামেশ্বৰ তেলীয়ে টুলুঙা মন্তব্য দিয়া দেখা গৈছে। তেওঁ এইবোৰক সৰু বিসংগতি আখ্যা দিয়ে।

“ডাঙৰ অনুষ্ঠান পাতিলে এনেকুৱা সৰু সৰু বিসংগতি হয়েই”, সাংসদ তেলীৰ মন্তব্য।

উল্লেখযোগ্য যে সংবাদ মাধ্যমৰ আগত বি পি এফৰ সাংসদ বিশ্বজিৎ দৈমাৰীয়ে প্ৰকাশ কৰামতে, তেওঁৰ টিকট বৈধ নহয় বুলি কোৱাৰ ধৃষ্টতা দেখুৱাইছিল আয়োজকৰ কৰ্মকৰ্তাই।

নিজৰ সমষ্টিতে বহিৰাগত অনুষ্ঠানৰ দ্বাৰা অপমানিত হোৱাৰ পিছতো সাংসদ কুইন ওজায়ো অৱশ্যে এই পৰ্য্যন্ত কোনো প্ৰতিক্ৰিয়া প্ৰকাশ কৰা নাই।