ক্ৰিকেটৰ পৰা সন্যাসৰ পিছত কি কৰিব ধোনীয়ে! জনালে নিজ ইচ্ছা
ভাৰতীয় ক্ৰিকেটৰ শ্ৰেষ্ঠতম অধিনায়ক হিচাপে নিজকে প্ৰতিষ্ঠা কৰাৰ পিছত ২০১৯ চনত আন্তৰ্জাতিক ক্ৰিকেটৰ পৰা অৱসৰ গ্ৰহণ কৰিছিল মহেন্দ্ৰ সিং ধোনীয়ে। ইয়াৰ পিছতো অৱশ্যে তাৰকাগৰাকীয়ে অংশ লৈ আহিছে ইণ্ডিয়ান প্ৰিমিয়াৰ লীগত।
যোৱা দুই-তিনিটা আই পি এল ছিজনৰ পিছত ধোনীয়ে সম্পূৰ্ণ ৰূপে ক্ৰিকেটৰ পৰা অৱসৰ গ্ৰহণ কৰিব নেকি সেই লৈ চৰ্চা চলে। অৱশ্যে প্ৰতিবাৰেই তেনে সম্বাৱনা নাকচ কৰি আহিছে ধোনীয়ে। বিগত বাৰৰ আই পি এল খিতাপ জয়ৰ পিছতো ধোনীয়ে অৱসৰৰ সম্ভাৱনা অস্বীকাৰ কৰিছিল।
সেয়েহে আগন্তুক ছিজনৰ আই পি এল আৰম্ভ হ’লে সকলোৰে দৃষ্টি থাকিব ধোনীৰ ওপৰত। সম্প্ৰতি ৪২ বৰ্ষীয় ধোনীয়ে যে ইয়াৰ পিছত আই পি এলতো খেল অব্যাহত ৰাখিব, সেয়া আশা কিছু ক্ষীণ। অৱশ্যে ধোনীয়ে সময়ত কি সিদ্ধান্ত লয়, সেয়া পূৰ্বানুমান কৰা কঠিন।
তথাপি তাৰকাগৰাকীক লৈ অব্যাহত হৈ থাকে চৰ্চা। ক্ৰিকেটৰ পৰা অৱসৰৰ পিছত পৰিকল্পনা কি হ’ব, সেই সন্দৰ্ভত ধোনীক শেহতীয়াকৈ এক প্ৰশ্ন কৰা হৈছিল। সেই প্ৰশ্নৰ উত্তৰত ধোনীয়ে দিয়ে ভৱিষ্যতৰ পৰিকল্পনাৰ এক আভাস।
অৱশ্যে ধোনীয়ে তেনে কোনো স্পষ্ট উত্তৰ দিয়া নাছিল। এই বিষয়ে কেতিয়াও ভবা নাই বুলিহে তেওঁ কয়। তাৰ মাজতে তেওঁ প্ৰকাশ কৰে যে ভাৰতীয় সেনাৰ সৈতে তেওঁ অলপ বেছি সময় কটাব বিচাৰে। ধোনীয়ে কয়, “মই এতিয়াও ক্ৰিকেট খেলি আছো।”
“আই পি এল মই এতিয়াও খেলি আছো। ক্ৰিকেটৰ পিছত মই কি কৰিম সেয়া চাবলৈ বৰ আকৰ্ষণীয় হ’ব। মই নিশ্চিতভাৱে ভাবো, মই অলপ বেছি সময় সেনাবাহিনীৰ সৈতে কটাব বিচাৰো।কাৰণ যোৱা কেইবছৰমানৰ পৰা মই তেনেকুৱা কৰিব পৰা নাই।”— ধোনীয়ে লগতে কয়।
After Cricket, i want to spend Bit More Time With the Army ❤️😇#MSDhoni pic.twitter.com/6J7EaySSop
— Chakri Dhoni (@ChakriDhoni17) December 21, 2023
উল্লেখ্য যে, ২০১১ চনত ভাৰতীয় সেনাৰ সৈতে যুক্ত হৈছিল ধোনী। ২০১১ চনত ধোনীক লেফটেনেণ্ট কৰ্ণেলৰ সন্মানীয় পদবী প্ৰদান কৰা হৈছিল।পাঁচটা পেৰাচুট প্ৰশিক্ষণ জাম্প সম্পূৰ্ণ কৰাৰ পিছত তেওঁ এজন যোগ্য পেৰাট্ৰুপাৰো।