কেন্দ্ৰীয় চৰকাৰৰ প্ৰস্তাৱলৈ সঁহাৰি: দেশৰ এটৰ্নি জেনেৰেল হিচাপে পুনৰ নিযুক্ত হ’ব মুকুল ৰোহতগী

প্ৰবীণ অধিবক্তা মুকুল ৰোহতগীক ভাৰতৰ এটৰ্নি জেনেৰেল হিচাপে পুনৰ নিযুক্তি দিয়াৰ বাবে সাজু হৈছে কেন্দ্ৰীয় চৰকাৰ। অহা ১ অক্টোবৰৰ পৰা ভাৰতৰ এটৰ্নি জেনেৰেল হিচাপে ৰোহতগীয়ে নিজৰ দ্বিতীয়টো কাৰ্যকাল আৰম্ভ কৰিব।

প্ৰকাশিত বাতৰি অনুসৰি, প্ৰধানমন্ত্ৰীৰ কাৰ্যালয়ে আগবঢ়োৱা প্ৰস্তাৱৰ সঁহাৰি জনাই ৰোহতগীয়ে যোৱা সপ্তাহত ভাৰতৰ এটৰ্নি জেনেৰেলৰ কাৰ্যভাৰ গ্ৰহণ কৰিবলৈ সন্মত হৈছে।

বৰ্তমানৰ এটৰ্নি জেনেৰেল হিচাপে কাৰ্যনিৰ্বাহ কৰি থকা কে.কে. বেণুগোপালে অহা ৩০ ছেপ্টেম্বৰত পদত্যাগ কৰাৰ ইচ্ছা প্ৰকাশ কৰিছে। বেণুগোপালৰ স্থানত ৰোহতগী এই পদত অধিষ্ঠিত হ’ব।

ইয়াৰ পূৰ্বে ৰোহতগীয়ে ২০১৪ চনৰ পৰা ২০১৭ চনলৈ ভাৰতৰ এটৰ্নি জেনেৰেল হিচাপে কাৰ্যনিৰ্বাহ কৰিছিল।

মুকুল ৰোহতগীক ১৯৯৩ চনত জ্যেষ্ঠ পৰামৰ্শদাতা হিচাপে মনোনীত কৰা হৈছিল আৰু পিছত ১৯৯৯ চনত অতিৰিক্ত ছলিচিটৰ জেনেৰেল হিচাপে নিযুক্ত কৰা হৈছিল।

তেওঁ ২০০২ চনৰ গুজৰাটৰ গোধৰা কাণ্ডৰ গোচৰত উচ্চতম ন্যায়ালয়ত চৰকাৰক প্ৰতিনিধিত্ব কৰিছিল।