মৰ্মান্তিক! বাইক চলাই যোৱা অৱস্থাতে চিলাৰ তাঁৰে কাটিলে ডিঙি; মৃত্যু আৰক্ষীৰ জোৱানৰ

এক অনাকাংক্ষিত ঘটনাৰ পৰিণতিত মৃত্যুমুখত পৰিছে মুম্বাই আৰক্ষীৰ কনিষ্টবল। কৰ্তব্যস্থানৰ পৰা ঘৰ অভিমুখে আহি থকা অৱস্থাতে শোকাৱহ এক ঘটনাত মৃত্যু হয় জোৱানজনৰ।

এই ঘটনা দেওবাৰে বিয়লি। কনিষ্টবল সমীৰ সুৰেশ যাদৱ গোৰেগাঁৱৰ দিনদোশী আৰক্ষী থানাৰ পৰা নিয়মীয়া ডিউটিৰ অন্তত ৰাওনা হৈছিল ৱৰ্লিত থকা নিজ গৃ্হলৈ।

যাদৱ ৱেষ্টাৰ্ণ এক্সপ্ৰেছ ঘাইপথৰ ভাকোলা দলং পূৱাৰ সময়তে কোনো লোকে উৰুৱাই থকা চিলাৰ তাঁৰে আঘাত কৰে তেওঁৰ ডিঙিত।

চিলাৰ তাঁৰে যাদৱৰ ডিঙি দকৈ কাটি নিয়ে। এই ঘটনাৰ পিছতে তেওঁক ততাতৈয়াকৈ ওচৰৰ চিকিৎসালয়লৈ লৈ যোৱা হয়।

কিন্তু চিকিৎসালয়ত উপস্থিত হোৱাৰ পিছতে চিকিৎসকে তেওঁক মৃত ঘোষণা কৰে। এগৰাকী আৰক্ষী বিষয়াই সংবাদ মাধ্যমক এই ঘটনাৰ বিষয়ে অৱগত কৰে।

তদন্তৰ বাবে আৰক্ষীৰ এটা দল ঘটনাস্থলীত উপস্থিত হয় আৰু যাদৱৰ পৰিয়ালক ঘটনাৰ বিষয়ে অৱগত কৰা বুলিও তেওঁ জানিবলৈ দিয়ে।