বগীবিল দলঙৰ উদ্বোধনী দিন পিছুৱাবলৈ মোডীলৈ পত্ৰ প্ৰেৰণ টুকীৰ

বগীবিল দলংখনৰ উদ্বোধনী দিন পিছুৱাবলৈ অৰুণাচলৰ প্ৰাক্তন মুখ্য মন্ত্ৰী তথা কংগ্ৰেছী বিধায়ক নবাম টুকীয়ে প্ৰধান মন্ত্ৰী নৰেন্দ্ৰ মোডীক পত্ৰযোগে অনুৰোধ জনাইছে। বহু প্ৰত্যাশিত বগীবিল দলংখনৰ উদ্বোধনী দিন ২৫ ডিচেম্বৰ হোৱা বাবে আৰু এই দিনটোটেই আৰু খৃষ্টিয়ানসকলৰ উৎসৱ বৰদিন পৰা বাবে টুকীয়ে প্ৰধান মন্ত্ৰীগৰাকীলৈ এই অনুৰোধ জনায়।

উল্লেখ্য যে কেন্দ্ৰই ২৫ ডিচেম্বৰৰ দিনটো ভাৰতৰ প্ৰাক্তন প্ৰধান মন্ত্ৰী অটল বিহাৰী বাজপায়ীৰ জন্ম দিন হিচাপে সুশাসন দিৱস হিচাপে ঘোষণা কৰিছে।

পত্ৰখনত টুকীয়ে লিখিছে, ‘‘আমি জানো যে আপুনি ঐতিহাসিক বগীবিল দলংখন চলিত বৰ্ষৰ ২৫ ডিচেম্বৰৰ দিনা উদ্বোধন কৰিবলৈ আগবাঢ়িছে। এই এই অঞ্চলৰ ৰণনীতিগত আৰু অৰ্থনৈতিক দৃষ্টিকোণৰ পৰা অতি গুৰুত্বপূৰ্ণ এই দলংখনৰ নিৰ্মাণ সম্পূৰ্ণ কৰা দেখি আপোনাক অভিনন্দন জনোৱাৰ লগতে এই দলংখনৰ উদ্বোধনী দিনটো পিছুৱাবলৈ অনুৰোধ জনাওঁ। কাৰণ বৰদিন খৃষ্টিয়ানসকলৰ এটা অতি গুৰুত্বপূৰ্ণ উৎসৱ।

পত্ৰখনত আৰু কোৱা হৈছে, ‘‘দলংখন অসম আৰু অৰুণাচলৰ জনসাধাৰণৰ বাবে এটা আশীৰ্বাদস্বৰূপ হোৱা বাবে বহুতো লোকে এই বৰদিনৰ উৎসৱত যোগদান কৰিব আৰু সেইদিনাই দলংখন উদ্বোধন হ’ব। ফলত বহুতো মানুহে এই ঐতিহাসিক ক্ষণটো উপভোগ কৰাৰ পৰা বঞ্চিত হ’ব। সেয়ে মই আপোনাক দলহৰ উদ্বোধনী দিনটো পিছুৱাবলৈ অনুৰোধ জনাইছোঁ।

উল্লেখ্য যে উদ্বোধন হোৱাৰ পাছত বগীবিল দলংখন এছিয়াৰ দ্বিতীয় দীৰ্ঘতম দলং হিচাপে পৰিগণিত হ’ব। উজনি অসম আৰু অৰুণাচলৰ প্ৰায় ৫ মিলিয়ন জনতাৰ বাবে সংযোগ-সেতু হোৱাৰ উপৰিও এই দলংখন দেশৰ নিৰাপত্তা আৰু অৰ্থনৈতি দৃষ্টিকোণৰ পৰা অতি গুৰুত্বপূৰ্ণ বিবেচিত হ’ব।