দেৰি কৰিব নালাগে: নাগা আলোচনা সন্দৰ্ভত দুয়ো পক্ষৰ প্ৰতি এন টি চি
নাগালেণ্ড ট্ৰাইবছ কাউন্সিলে দেওবাৰে নাগা আলোচনাৰ দুয়ো পক্ষ— ভাৰত চৰকাৰ আৰু দুই নাগা গোটক সোনকালে সমাধানলৈ আহিবলৈ পৰামৰ্শ আগবঢ়াইছে।
আলোচনা প্ৰক্ৰিয়াটোত দেৰি লগাব পৰা পথত সোমাই নপৰি মুক্ত মন আৰু সাহসেৰে ইয়াক সামৰিবলৈ কাউন্সিলে দুয়ো পক্ষক পৰামৰ্শ আগবঢ়াইছে।
বৰ্তমানৰ সময় অতি “গুৰুত্বপূৰ্ণ” বুলি উল্লেখ কৰি কাউন্সিলে কৈছে যে বিবাদমূলক বিষয়বিলাকক সিদ্ধান্তৰ বাটত বাধা হ’বলৈ দিয়া উচিত নহ’ব।
কাউন্সিলে ইয়াৰ বাবে সমাধান-উত্তৰ (post solution) সময়ত অমীমাংসিত সমস্যাসমূহৰ সমাধান কৰাৰ কথা কৈছে।
“উমৈহতীয়া আগ্ৰহৰ যিকোনো বিষয়ৰ সমাধান-উত্তৰ বিচৰাটো নাগাসকলৰ সামূহিক দায়িত্ব হ’ব,” এন টি চিৰ অধ্যক্ষ তনিহ’ য়েপতমি আৰু সাধাৰণ সম্পাদক নৃবেম’ গুলিয়ে জাৰি কৰা বিবৃতিত প্ৰকাশ।
কাউন্সিলৰ মতে, ভাৰত চৰকাৰ আৰু নাগা আলোচনাৰ সমাধান “ৰাজনৈতিক” আৰু ৰাজনৈতিক সমাধানে ভৱিষ্যতে সেই সমস্যাসমূহ কেৱল সমাধান কৰাই নহয়, সামগ্ৰিক ছবিখনৰ ওপৰতো ধনাত্মক প্ৰভাৱ পেলাব।
“যুদ্ধবিৰতি হৈছে ভাৰত চৰকাৰ আৰু নাগা আলোচনাকাৰীৰ মাজত ৰাজনৈতিক বন্দৱস্তৰ আহিলা আৰু চলিত বন্দৱস্তি হৈছে ৰাজনৈতিক সমাধানৰ আহিলা,” কাউন্সিলৰ মত।
কাউন্সিলে মত পোষণ কৰে যে ইমান শ্ৰমৰ পিছত প্ৰক্ৰিয়াটো “অৰ্থহীন অনুশীলন”ত পৰিণত হ’বলৈ দিয়াটো উচিত নহ’ব।
চলিত আলোচনা প্ৰক্ৰিয়াটো কিমান গুৰুত্বপূৰ্ণ সেই কথা উপলব্ধিত বিফল হোৱাৰ পৰিণাম হ’ব “অনুশোচনা”তকৈ বেলেগ আৰু একো নহ’ব, কাউন্সিলে কয়।
নাগা আলোচনাত ভাৰত চৰকাৰৰ মধ্যস্থতাকাৰী তথা নাগালেণ্ডৰ বৰ্তমানৰ ৰাজ্যপাল আৰ এন ৰবি আৰু কেন্দ্ৰীয় গৃহ মন্ত্ৰী অমিত শ্বাহৰ মাজত নতুন দিল্লীত শুকুৰবাৰে হোৱা বৈঠকত বিষয়টো আলোচিত হোৱা বুলি বাতৰি প্ৰকাশ পাইছে।
শেহতীয়াকৈ ৰাজ্যপাল ৰবিয়ে নাগালেণ্ডৰ বাবে পৃথক সংবিধান আৰু পতাকাৰ দাবীক কেন্দ্ৰীয় চৰকাৰে নাকচ কৰাৰ কথা সদৰী কৰিছিল।
১৯৯৭ চনৰ পৰা ভাৰত চৰকাৰৰ লগত আলোচনাত থকা এন এচ চি এন (আই এম) নেতা থুইগালেং মুইভাই কেন্দ্ৰৰ স্থিতিৰ বিৰোধিতা কৰি সুকীয়া পতাকা আৰু সংবিধানক নাগা আলোচনাৰ মূল বিষয়ৰূপে অভিহিত কৰিছিল।
তাৰ পিছতেই আলোচনাটোৰ “ফ্ৰেইমৱৰ্ক এগ্ৰিমেণ্ট”খনৰ নীতি শীঘ্ৰে কাৰ্য্যকৰী কৰাৰ দাবীত নাগা ষ্টুডেণ্টছ ফেডাৰে’চনে নতুন দিল্লীত সমদল বাহিৰ কৰিছিল।