বৃহস্পতিবাৰে নাগালেণ্ডত নতুনকৈ ক’ৰ’না আক্ৰান্ত ৯০ গৰাকী লোক
নাগালেণ্ডত বৃহস্পতিবাৰে নতুনকৈ ৯০ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।
বুধবাৰে ক’ৰ’না পৰীক্ষা কৰা মুঠ ২৩৭ গৰাকী লোকৰ ভিতৰত এই ৯০ গৰাকীৰ ফলাফল ক’ৰ’না প’জিটিভ আহে।
বৃহস্পতিবাৰে নতুনকৈ ক’ৰ’না আক্ৰান্ত হোৱা এইসকল লোকৰ ভিতৰত ৬১ গৰাকী কোহিমা, ২৬ গৰাকী ডিমাপুৰৰ, দুগৰাকী পেৰেন আৰু এগৰাকী ফেকৰ।
নাগালেণ্ডৰ স্বাস্থ্য মন্ত্ৰী এছ পাংগয়ু ফোমে চৰকাৰী টুইটাৰ যোগে এই কথা প্ৰকাশ কৰে।
”বুধবাৰে সংগ্ৰহ কৰা ২৩৭ টা নমুনাৰ ভিতৰত ৯০ গৰাকী ক’ৰ’না প’জিটিভ পোৱা গৈছে। ৬১ গৰাকী কহিমাৰ, ২৬ গৰাকী ডিমাপুৰৰ, দুগৰাকী পেৰেন আৰু এগৰাকী ফেকৰ,” স্বাস্থ্য মন্ত্ৰী গৰাকীয়ে এইদৰে টুইট কৰে।
উল্লেখযোগ্য যে, নাগালেণ্ডত ক’ৰ’না আক্ৰান্ত লোক সকলৰ অধিকাংশই বহিঃৰাজ্যৰ পৰা নিজ গৃহলৈ উভতি অহা।
বিশেষকৈ দিল্লী, কৰ্ণাটক, মুম্বাই আদি ঠাইৰ পৰা নিজ ৰাজ্যলৈ উভতি অহা লোকৰ শৰীৰত ক’ৰ’না ভাইৰাছৰ যথেষ্ট সংখ্যক উপস্থিতি ধৰা পৰিছে।
আনহাতে, নাগালেণ্ডৰ ভিতৰত কহিমাত সৰ্বাধিক সংখ্যক লোক ক’ৰ’না ভাইৰাছৰ দ্বাৰা সংক্ৰমিত হৈছে।
নাগালেণ্ডৰ মুখ্য মন্ত্ৰীয়ে ৰাজ্যখনৰ জনসাধাৰণক আতংকিত নহবলৈ আহ্বান জনাই সামাজিক দূৰত্ব মানি চলি মুখত মাস্ক পৰিধান কৰি থকাৰ বাবে কয়।