সাত বছৰৰ মূৰত ভাৰতৰ হৈ টেষ্ট খেলাৰ সুযোগ পালে বাঁওহতীয়া বেগী বলাৰে
ভাৰতীয় দলৰ টেষ্ট ক্ৰিকেটৰ ইতিহাস চালে আমি দেখো যে দলত খুব কম সংখ্যকহে বাঁওহতীয়া বেগী বলাৰে সুযোগ লাভ কৰে।
অৱশ্যে দলত সময়ে সময়ে বাঁওহতীয়া স্পিনাৰ আহিছে যদিও বেগী বলাৰৰ অনুপস্থিতি বাৰুকৈয়ে অনুভৱ হয়।
ভাৰতীয় টেষ্ট দলত বাওঁহতীয়া বেগী বলাৰ বুলি ক’লে আমি সাধাৰণতে আশীষ নেহৰা, জাহিৰ খান আৰু ইৰফান পাঠানকে জানো।
ইয়াৰ মাজতে দুই এজনে সুযোগ পাইছিল যদিও এই তিনিগৰাকীক বাদ দি আজিলৈ এজনো বাঁওহতীয়া বেগী বলাৰে বিশেষ একো কৰিব পৰা নাই।
কিন্তু ইতিহাস সলনি হ’ল, ব্ৰীছবেন টেষ্টত অন্তিম একাদশত সুযোগ লাভ কৰিছে টি নটৰাজনে। ভাৰতীয় টেষ্ট দলত অভিষেক ঘটা তেওঁ ৩০০ নম্বৰ ক্ৰিকেটাৰ।
আচলতে টি নটৰাজনৰ পূৰ্বে বাঁওহতীয়া বলাৰ হিচাপে ভাৰতৰ হৈ শেষবাৰৰ বাবে টেষ্ট খেলিছিল জাহিৰ খানে।
জাহিৰ খানে ২০১৪ চনত নিউজিলেণ্ডৰ বিৰুদ্ধে ৱেলিংটনত অন্তিমখন টেষ্ট মেচ খেলিছিল।
আশ্চৰ্য্যজনকভাৱে, যোৱা সাত বছৰত আজিলৈকে কোনো এজন বাওঁহতীয়া বেগী বলাৰে ভাৰতীয় দলত খেলাৰ সুযোগ পোৱা নাছিল।
এতিয়া টি নটৰাজনে অষ্ট্ৰেলিয়াৰ বিৰুদ্ধে ব্ৰীছবেনত চলি থকা টেষ্ট শৃংখলাৰ অন্তিমখন টেষ্টত খেলাৰ সুযোগ লাভ কৰিছে।
উল্লেখ্য যে, একেটা ভ্ৰমণতে টি-২০, এদিনীয়া আৰু টেষ্ট ক্ৰিকেটত অভিষেক ঘটা টি নটৰাজন হৈছে একমাত্ৰ ভাৰতীয় ক্ৰিকেটাৰ।
The stuff dreams are made of. A perfect treble for @Natarajan_91 as he is presented with #TeamIndia‘s Test 🧢 No. 300. It can’t get any better! Natu is now an all-format player. #AUSvIND pic.twitter.com/cLYVBMGfFM
— BCCI (@BCCI) January 14, 2021
তেওঁক প্ৰথমে এদিনীয়া শৃংখলাৰ অন্তিম তথা তৃতীয়খন মেচত সুযোগ দিয়া হৈছিল। ইয়াৰ পিছত তেওঁ টি-২০ শৃংখলাৰ তিনিওখন মেচ খেলি ৬টা উইকেট দখল কৰে। আৰু আজি ব্ৰীছবেনত তেওঁৰ টেষ্ট অভিষেক ঘটে।
এতিয়া প্ৰতিভাধৰ বাওঁহতীয়া বলাৰ টি নটৰাজনৰ কেৰিয়াৰ কোন দিশে আগবাঢ়ে সেয়া লক্ষ্যণীয় হ’ব।
ইফালে আজিৰ পৰা আৰম্ভ হোৱা এই মেচখনত নটৰাজনৰ উপৰি অফ স্পিনাৰ ৱাশ্বিংটন সুন্দৰেও কেৰিয়াৰৰ প্ৰথমখন টেষ্ট খেলাৰ সুযোগ লাভ কৰিছে।