গৰ্ভৱতী সাংবাদিকক “আঁতৰোৱা” প্ৰাগ নিউজলৈ কাৰণ দৰ্শোৱাৰ জাননী ৰাষ্ট্ৰীয় মহিলা আয়োগৰ

এগৰাকী গৰ্ভৱতী সাংবাদিকক “কামৰ পৰা আঁতৰোৱা” গুৱাহাটীস্থিত চেটেলাইট নিউজ চেনেল প্ৰাগ নিউজৰ “অসংবেদনশীল মনোবৃত্তি”ক ৰাষ্ট্ৰীয় মহিলা আয়োগে মঙলবাৰে গৰিহণা দিছে।

প্ৰাগ নিউজত ১৩ বছৰ কাম কৰা ৰঞ্জিতা ৰাভা নামৰ সাংবাদিকগৰাকীক তেওঁ গৰ্ভৱতী হোৱাৰ বাবে পদত্যাগ কৰিবলৈ বাধ্য কৰোৱা হৈছিল।

“মহিলাৰ সকলো অধিকাৰৰ ভিতৰত এটা হৈছে মাতৃত্বৰ অধিকাৰ; তথাপি অসমৰ শেহতীয়া এক ঘটনাই গৰ্ভৱতী কৰ্মচাৰীৰ প্ৰতি সংস্থাসমূহৰ দুমুখীয়া স্থিতিক উদঙাই দিছে,” এন চি ডব্লিউ-এ এক বিবৃতিত কয়।

“Indian Journalists Union criticises Prag News for sacking pregnant journalist” শীৰ্ষক এক বাতৰি যোৱা ২২ মে’ত এন চি ডব্লিউৰ দৃষ্টিগোচৰ হৈছে বুলি কোৱা হৈছে য’ত প্ৰকাশ পাইছিল যে এগৰাকী গৰ্ভৱতী জ্যেষ্ঠ সাংবাদিকক তেওঁৰ সংস্থাটোৰ পৰা “পদত্যাগ কৰিবলৈ বাধ্য” কৰোৱা হৈছে।

প্ৰতিবেদনটোত কোৱা হৈছিল যে মহিলাগৰাকীৰ গৰ্ভধাৰণে তেওঁৰ “তৎপৰতা”ক সীমিত কৰিছে আৰু প্ৰাগ নিউজক ইয়াৰ সংগঠনত সাংবাদিকৰূপে কেৱল “তৎপৰ ব্যক্তি”ৰহে প্ৰয়োজন।

“গৰ্ভৱতী কৰ্মচাৰীগৰাকীৰ প্ৰতি চেনেলটোৰ অসংবেদনশীল মনোবৃত্তিক এন চি ডব্লিৱে গৰিহণা দিছে,” বিবৃতিটোত কোৱা হৈছে।

Maternity Benefit Act, 1961ৰ ব্যৱস্থাসমূহৰ উলংঘনত গভীৰভাৱে উদ্বিগ্ন হৈ এন চি ডব্লিৱে ঘটনাটোৰ ওপৰত অতি শীঘ্ৰে মতামত প্ৰেৰণৰ বাবে প্ৰাগ নিউজক নিৰ্দেশ দিছে।

ইয়াৰ পূৰ্বে ইণ্ডিয়ান জাৰ্নেলিষ্ট ইউনিয়নে প্ৰাগ নিউজৰ মেনেজমেণ্টে ৰঞ্জিতা ৰাভাক সেৱাৰ পৰা অপসাৰণ কৰাক লৈ গভীৰ উদ্বিগ্নতা প্ৰকাশ কৰিছিল।

“ৰাভাই দাবী কৰা অনুসৰি, তেওঁ চি এম ডি সঞ্জীৱ নাৰায়ণৰ সন্মুখত পোনপটীয়াকৈ বিষয়টো উত্থাপন কৰিছিল, কিন্তু তেওঁ তেওঁক কৈছিল যে ‘প্ৰাগ নিউজৰ মেটাৰনিটি লীভৰ কোনো সুবিধা নাই আৰু কোনো দৰমহা আদায় দিয়া নহয়’ আৰু তেওঁক পদত্যাগ দাখিল কৰাৰ বাবে পৰামৰ্শ দিয়ে,” আই জে ইউৱে কয়।

আই জে ইউৱে কয় যে ৰাভাক প্ৰাগ নিউজ চেনেলৰ মেনেজমেণ্টে কামৰ পৰা আঁতৰোৱাতো অগ্ৰহণযোগ্য আৰু ই “লিংগ বৈষম্যৰ এক স্পষ্ট ঘটনা।”

আই জে ইউৱে কয় এই জটিল সময়চোৱাত ক’ভিড-১৯ৰ বিৰুদ্ধে যুঁজৰ আগশাৰীত থকা এগৰাকী মাতৃত্ব-প্ৰত্যাশী সাংবাদিকক কামৰ পৰা আঁতৰোৱাতো অমানৱীয় আৰু লিংগ-পক্ষপাতজনক।

Network of Women in Media, India (NWMI)এও ৰাভাক কামৰ পৰা পদত্যাগ কৰিবলৈ বাধ্য কৰোৱাৰ পিছত গভীৰ আশ্চৰ্য্য প্ৰকাশ কৰিছিল।