কূটাঘাতেৰে জাতিৰ মুক্তি নাহে, কিয় নুবুজে পৰেশ বৰুৱাই

কূটাঘাতেৰে জাতিৰ মুক্তি নাহে, আৰু এই কথাটো পৰেশ বৰুৱাই কিয় বুজি নাপায় বুলি একধৰণৰ আক্ষেপ প্ৰকাশ কৰিছে জিতেন দত্তই।

আলফা-স্বাধীন সংঘটিত গুৱাহাটীৰ শেহতীয়া গ্ৰেনে’দ বিস্ফোৰণক গৰিহণা দি ফে’চবুকত আলোচনাৰত আলফা নেতাজনে এই মন্তব্য কৰিছে।

তেওঁ লগতে কয় এনে ঘটনাই আলফাক গণবিচ্ছিন্ন কৰি বিপ্লৱী সংগঠনৰ পৰা সন্ত্ৰাসবাদী সংগঠনলৈ ৰূপান্তৰিত কৰিছে।

স্বাধীনতাৰ দাবী এৰি ২০০৮ চনত অস্ত্ৰবিৰতি ঘোষণাৰে আলোচনাৰ মেজলৈ অহা দত্তই জাতীয় মুক্তিৰ বাবে গণসংগ্ৰামৰ পোষকতা কৰিছে।

দত্তৰ প’ষ্টটোত পৰেশ বৰুৱাক গণসংগ্ৰামৰ নেতৃত্বলৈ আহ্বান জনোৱা ধৰণৰ এক ইংগিতো আছে।

“কোনোবাই বেয়া পালেও কওঁ যে স্বাধীনতাৰ বিপৰীতে আলফাই অসমীয়া জাতিৰ অস্তিত্ব সুৰক্ষিত হ’ব পৰাকৈ বাংলাদেশীমুক্ত এখন অসম প্ৰতিষ্ঠা কৰি অসমীয়াই অৰ্থনৈতিক আৰু ৰাজনৈতিকভাৱে শক্তিশালী হৈ মূৰ তুলি যাতে জীয়াই থাকিব পাৰে, তাৰ বাবে সংগ্ৰামখনক আগবঢ়াই নিয়ক৷ আমি সকলো সহযোগ কৰিবলৈ প্ৰস্তুত৷”

দত্তৰ পূৰ্বে বৰ্তমান আলোচনাৰত তথা আলফাৰ প্ৰতিষ্ঠাপক সাধাৰণ সম্পাদক অনুপ চেতিয়াও গ্ৰেনে’দ বিস্ফোৰণটোক গৰিহণা দিছিল।

আলফা নেতাসকলে ঘটনাটোৰ গৰিহণা দিয়াৰ বিপৰীতে পৰেশ বৰুৱাই বিস্ফোৰণটোক “শত্ৰু”ৰ ওপৰত আক্ৰমণৰূপে বৈধতা দিছে।

নিজাববীয়া অস্ত্ৰবিৰতি ঘোষণা কৰা ২৮ নং বেতেলিয়নৰ লগতে পৰৱৰ্তী সময়ত বাংলাদেশে ভাৰতক গতাই দিয়া অৰৱিন্দ ৰাজখোৱা, অনুপ চেতিয়াকে ধৰি অধিকাংশ নেতাই বৰ্তমান “আলফা”ৰূপে ভাৰত চৰকাৰৰ সৈতে আলোচনা চলাই আছে।

“ভাৰতীয় সংবিধানৰ আধাৰত অসমলৈ অধিক আত্ম নিয়ন্ত্ৰণৰ অধিকাৰ, অসম চুক্তিৰ আধাৰত বিদেশী বহিষ্কাৰ আৰু অসমত দ্বি নাগৰিকত্ব”— স্বাধীনতাৰ দাবীৰ সলনি আলফাৰ বৰ্তমান এইকেইটা মূল দাবী বুলি দত্তই পূৰ্বে সদৰী কৰিছিল।

বিপৰীতে, আলফা-স্বাধীনৰ জৰিয়তে পৰেশ বৰুৱা এতিয়াও অসমৰ স্বাধীনতাৰ দাবীত অটল।

“সাৰ্বভৌমত্ব”ৰ প্ৰশ্ন আলোচনা কৰা (/নকৰা)ৰ স্থিতিয়ে আলফা-স্বাঃ (/ ভাৰত)ক মেজৰ পৰা আঁতৰাই ৰাখিছে।

লগতে পঢ়ক– আলফা (স্বাঃ)ৰ অ’ভাৰগ্ৰাউণ্ড ক্ৰিয়াকলাপ বৃদ্ধি হোৱাৰ কথা স্বীকাৰ গুৱাহাটীৰ আৰক্ষী আয়ুক্তৰ

লগতে পঢ়ক– বিস্ফোৰণত জড়িত নহয় প্ৰাণময়-জাহ্নৱী, আৰক্ষীয়ে “মে’কিং” কৰিছে