২০২৬ চনৰ মাৰ্চ মাহ পৰ্যন্ত শেষ হ’ব নক্সালবাদ; অস্ত্ৰ সম্বৰণৰ বাবে মাওবাদীক আহ্বান অমিত শ্বাহৰ

মাওবাদীক হিংসা ত্যাগ, অস্ত্ৰ সম্বৰণ আৰু আত্মসমৰ্পণৰ আহ্বান জনোৱাৰ সময়তে কেন্দ্ৰীয় গৃহমন্ত্ৰী অমিত শ্বাহে শুকুৰবাৰে ২০২৬ চনৰ ৩১ মাৰ্চ, দেশত নক্সালবাদৰ অন্ত পেলোৱাৰ তাৰিখ নিৰ্ধাৰণ কৰে।

নক্সাল হিংসাৰ বলি হোৱা ৫৫ জন লোকক সম্বোধন কৰি শ্বাহে কয়, “প্ৰধানমন্ত্ৰী নৰেন্দ্ৰ মোদীয়ে সিদ্ধান্ত লৈছে যে দেশৰ পৰা নক্সাল হিংসা আৰু মতাদৰ্শ মচি পেলোৱা হ’ব। ২০২৬ চনৰ ৩১ মাৰ্চ, এই দেশত নক্সালবাদৰ অন্তিম দিন হিচাপে নিৰ্ধাৰণ কৰা হৈছে আৰু মই নিশ্চিত কৰিম যে আমি তাৰ আগতে নক্সালবাদ শেষ কৰিম।”

গান্ধীনগৰৰ সাংসদগৰাকীয়ে আৰু কয় যে মাওবাদীৰ বিৰুদ্ধে চলা অভিযানত নিৰাপত্তা বাহিনীয়ে উল্লেখযোগ্য সফলতা লাভ কৰিছে কাৰণ বৰ্তমান এই সমস্যা ছত্তীশগড়ৰ মাত্ৰ চাৰিখন জিলাতে আবদ্ধ হৈ আছে।

শ্বাহে কয় যে এসময়ত মাওবাদীয়ে পশুপতিনাথ (নেপাল)ৰ পৰা তিৰুপতি (অন্ধ্ৰ প্ৰদেশ)লৈ কৰিড’ৰ স্থাপনৰ পৰিকল্পনা কৰিছিল যদিও সেইটো নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে ধ্বংস কৰি পেলাইছিল।

কেন্দ্ৰীয় গৃহ মন্ত্ৰালয়ে অতি সোনকালে ৰাজ্য চৰকাৰৰ সৈতে ঘনিষ্ঠ সমন্বয়ত ছত্তীশগড়ৰ নক্সাল হিংসা আক্ৰান্ত লোকসকলৰ বাবে কল্যাণমূলক আঁচনি এখন উলিয়াব বুলি শ্বাহে জনায়।

চাকৰি, স্বাস্থ্যসেৱা আৰু অন্যান্য ক্ষেত্ৰত আমাৰ কল্যাণমূলক ব্যৱস্থাৰ জৰিয়তে আমি আপোনালোকক যিকোনো প্ৰকাৰে সহায় কৰিম বুলিও কয় শ্বাহে।

নিৰাপত্তা বাহিনীয়ে নক্সালবাদৰ বিৰুদ্ধে অভিযান তীব্ৰতৰ কৰি তুলিছে, এই বছৰ নিৰাপত্তা বাহিনীয়ে নক্সাল বিৰোধী অভিযানত ১৬৪ জন মাওবাদী নিহত হৈছে।

দক্ষিণ এছিয়া সন্ত্ৰাসবাদ পৰ্টেল (SATP)ৰ দ্বাৰা সংকলিত আৰু সংবাদ মাধ্যমৰ বাতৰিৰ পৰা আহৰণ কৰা তথ্য অনুসৰি ২০২৪ চনৰ প্ৰথমাৰ্ধত কেৱল ছত্তীশগড়তে ১৬৪ জন মাওবাদীৰ ভিতৰত ১৪২ জন নিহত হৈছিল৷