বীৰ চিলাৰায় বঁটাৰ বাবে নিৰ্বাচিত শিৱসাগৰৰ নবোদয় বিদ্যালয়ৰ এনচিচি কেডেট তন্ময়ী শ্ৰুতিধাৰা গগৈ
Tanmayee Shrutidhara Gogoi শিৱসাগৰ জিলাৰ নাজিৰা নবোদয় বিদ্যালয়ৰ ছাত্ৰী তথা এনচিচিৰ কেডেট তন্ময়ী শ্ৰুতিধাৰা গগৈলৈ অসম চৰকাৰৰ ক্ৰীড়া আৰু যুৱ কল্যাণ সঞ্চালকালয়ে ২০২২-২০২৩ বৰ্ষৰ বীৰ চিলাৰায় বঁটা আগবঢ়াইছে৷
১০ম অসম বেটেলিয়নৰ ডিব্ৰুগড়ৰ এনচিচি ইউনিটৰ অধীনৰ এনচিচি কেডেট তন্ময়ী শ্ৰুতিধাৰা গগৈয়ে জুনিয়ৰ ছোৱালীৰ বিভিন্ন শাখাত শ্ৰেষ্ঠত্ব প্ৰদৰ্শন আগবঢ়োৱাৰ লগতে এনচিচি প্ৰশিক্ষণত অংশগ্ৰহণ কৰি সুনাম অৰ্জন কৰিছিল৷
অসম চৰকাৰৰ মুখ্য সচিব আৰু বীৰ চিলাৰায় এৱাৰ্ড ৰাজ্যিক কমিটিৰ অধ্যক্ষ জিষ্ণু বৰুৱাৰ অধক্ষ্যতাত অনুষ্ঠিত বাচনি সমিতিয়ে তন্ময়ী শ্ৰুতিধাৰা গগৈক এই বঁটাৰ বাবে নিৰ্বাচিত কৰিছে৷
তন্ময়ী শ্ৰুতিধাৰা গগৈ নাজিৰাস্থিত জৱাহৰলাল নৱোদয় বিদ্যালয় শিৱসাগৰৰ ছাত্ৰী৷ ডিব্ৰুগড়ৰ এনচিচি গ্ৰুপ হেড কোৱাৰ্টাৰৰ বিষয়া কৰ্ণেল আৰ ৰমেশ আৰু ডিব্ৰুগড়ৰ এনচিচি ইউনিট ১০ অসম বেটেলিয়নৰ কমাণ্ডিং অফিচাৰে কেডেটগৰাকীৰ এই সাফল্যৰ বাবে অভিনন্দন জ্ঞাপন কৰিছে।
ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই অহা ১৫ আগষ্ট তাৰিখে ৰাজ্যিক পৰ্যায়ৰ বঁটা প্ৰদান অনুষ্ঠানত তন্ময়ী শ্ৰুতিধাৰা গগৈক এই বঁটা প্ৰদান কৰিব৷
লগতে পঢ়ক: ফেচবুক একাউন্টৰ ওপৰত অসম আৰক্ষীৰ শেনচকু; ফেচবুক পোষ্টৰ বাবেই কাৰাগাৰলৈ ৭০ বছৰীয়া বৃদ্ধ
আনহাতে, এনচিচি বিষয়া ডা° বিষ্ণু প্ৰসাদ নায়কে কয় যে এই খবৰ নবোদয় বিদ্যালয় আৰু এনচিচি কেডেটসকলৰ বাবে গৌৰৱৰ বিষয়। অধ্যক্ষ চম্পক ৰঞ্জন বৰাই কেডেটসকলক অভিনন্দন জনায় আৰু তেওঁলোকক উৎসাহিত কৰে৷
তন্ময়ী শিৱসাগৰৰ জ্যেষ্ঠ সাংবাদিক জয়জ্যোতি গগৈ আৰু অন্নপূৰ্ণা গগৈৰ কনিষ্ঠা কন্যা।