নেডাৰ সন্মিলনত কনৰাড চাংমাৰ লজ্জাজনক মন্তব্য, “কেন্দ্ৰীয় গৃহ মন্ত্ৰীয়ে উত্তৰ-পূবৰ নেতাৰ নাম পৰ্যন্ত জানে”
উত্তৰ-পূবৰ ৰাজ্যবোৰৰ মাজত থকা সীমা সমস্যা সমাধান কৰিবলৈ অঞ্চলটোৰ সকলো নেতা ঐক্যবদ্ধ হোৱা প্ৰয়োজন –এই মন্তব্য নেডাৰ আহ্বায়ক হিমন্ত বিশ্ব শৰ্মাৰ। শ্ৰীমন্ত শংকৰদেৱ কলাক্ষেত্ৰত আজি নেডাৰ চতুৰ্থ সন্মিলনত তেওঁ এই বক্তব্য ৰাখে।
উত্তৰ পূবৰ ৮খন ৰাজ্যৰ মুখ্য মন্ত্ৰীসকল উপস্থিত থকা সন্মিলনত হিমন্ত বিশ্বই প্ৰতিজন মুখ্য মন্ত্ৰীয়ে অকংগ্ৰেছী হোৱাটোক সৌভাগ্য আখ্যা দিয়ে।
“উত্তৰ-পূবৰ সকলোৱে ভাতৃত্ববোধেৰে থাকিবৰ বাবে নেডাৰ দৰে এটা সন্মিলন থকাটো খুবেই প্ৰয়োজন। এই কথা চিন্তা কৰিয়ে নেডাৰ জন্ম হৈছে”, হিমন্তৰ মন্তব্য।
তেওঁ উত্তৰ-পূবত বাঢ়ি অহা ড্ৰাগছ সৰবৰাহৰ পৰা যুৱ প্ৰজন্মক আঁতৰাই ৰাখিবলৈ ব্যৱস্থা গ্ৰহণৰ বাবেও সকলো নেতাক এক হোৱাৰ আহ্বান জনায়।
সন্মিলনত উপস্থিত থকা মেঘালয়ৰ মুখ্য মন্ত্ৰী কনৰাড চাংমাই এন ডি এ চৰকাৰৰ উচ্চ প্ৰশংসা কৰিবলৈ গৈ সমগ্ৰ উত্তৰ-পূবক লঘু কৰা দেখা যায়।
“এতিয়া এজন কেন্দ্ৰীয় গৃহ মন্ত্ৰীয়ে উত্তৰ-পূবৰ নেতাৰ নাম পৰ্যন্ত জানে”, হীনমন্যতা প্ৰকাশ পোৱা এটা বক্তব্যত চাংমাই কয়।
চাংমাৰ মত পূৰ্বে কেন্দ্ৰত উত্তৰ-পূবৰ নেতাক লগ কৰাটো বাদেই বহিবলৈও দিয়া হোৱা নাছিল।
“আমি সদায় উপেক্ষিত আছিলোঁ। কিন্তু বৰ্তমান এন ডি এ অহাৰ পৰা সম্পূৰ্ণ বেলেগ এটা পৰিৱেশ দেখা যায়”, ২০১৬ চনতহে প্ৰথমবাৰ সাংসদ নিৰ্বাচিত হৈ কেন্দ্ৰৰ ৰাজনীতিলৈ যোৱা চাংমাৰ মন্তব্য।
চাংমা লোকসভাৰ প্ৰাক্তন অধ্যক্ষ তথা দিল্লীৰ ৰাজনীতিত উত্তৰ-পূবৰ এজন প্ৰভাৱশালী নেতা হিচাপে জনাজাত প্ৰয়াত পূৰ্ণ আঘিটোক চাংমাৰ পুত্ৰ।
কনৰাডে “নেডাই এটা পৰিয়াল হিচাপে কাম কৰি যাব” বুলি নিজৰ বক্তব্য প্ৰকাশ কৰে।
চাংমাই সন্মিলত উপস্থিত থকা কেন্দ্ৰীয় গৃহ মন্ত্ৰী অমিত শ্বাহক অসমৰ এন আৰ চিত বাদ পৰাসকলে যাতে কোনো ধৰণে কাষৰীয়া ৰাজ্যবোৰত প্ৰভাৱ পেলাবগৈ নোৱাৰে সেইটো নিশ্চিত কৰিবলৈ অনুৰোধ কৰে। লগতে কেব সম্পৰ্কতো স্থিতি স্পষ্ট কৰিবলৈ আহ্বান জনায়।
সন্মিলনত উপস্থিত থকা মুখ্য মন্ত্ৰী সৰ্বানন্দ সোণোৱালে উত্তৰ-পূবক এন ডি এ চৰকাৰে পৰিচয় দিলে বুলি মন্তব্য কৰে। তেওঁ সংবিধানৰ ৩৭০ অনুচ্ছেদ বাতিল কৰি জন্মু আৰু কাশ্মীৰক দেশৰ অভিন্ন অংগ কৰা বাবে কেন্দ্ৰীয় প্ৰধান মন্ত্ৰী মোদীক বৰাক-ব্ৰহ্মপুত্ৰৰ ৩ কোটি ৩০ লাখ লোকৰ হৈ ধন্যবাদ দিয়ে।
“পূৰ্বে ডনাৰ মন্ত্ৰী হ’বলৈ ১০ শতাংশ কমিশ্যন দিব লগীয়া হৈছিল”, উপস্থিত ডনাৰ মন্ত্ৰী জিতেন্দ্ৰ সিঙক উদ্দেশ্যে সোণোৱালে কয়।
সন্মিলনৰ আজি দ্বিতীয় দিনৰ কাৰ্য্যসূচী আছিল। উত্তৰ পূবৰ ৮খন ৰাজ্যৰ মুখ্য মন্ত্ৰীসকলৰ উপৰি গৃহ মন্ত্ৰী অমিত শ্বাহ, ড’নাৰ মন্ত্ৰী জিতেন্দ্ৰ সিং তোমৰ, উত্তৰ-পূবৰ মিত্ৰ দলৰ ৭জন সদস্য, উত্তৰ-পূবৰ ২৫গৰাকী সাংসদ উপস্থিত থাকে।