ফেপেৰি পাতিবলৈ এৰা নাই নেপালে; ৰাষ্ট্ৰসংঘ আৰু Googleক প্ৰেৰণ কৰিব বিতৰ্কিত মানচিত্ৰ
ভাৰতৰ সৈতে নেপালৰ সম্পৰ্কক লৈ এতিয়াও উত্তেজনাৰ উপশম ঘটা নাই। চীনৰ প্ৰৰোচনাতে ভাৰতৰ বিৰুদ্ধে এটাৰ পাছ আন এটা পদক্ষেপ গ্ৰহণ কৰি আহিছে।
নেপালে ইতিমধ্যে ভাৰতৰ সীমান্তৰ কালাপানী, লিপুলেখ আৰু লিম্পিয়াধুৰা এই তিনি অংশক নিজৰ বুলি দাবী কৰি বিতৰ্কিত মানচিত্ৰ প্ৰকাশ কৰিছিল।
দেশখনে এইবাৰ এই মানচিত্ৰৰ ইংৰাজী সংস্কৰণ প্ৰকাশ কৰি সেয়া ৰাষ্ট্ৰসংঘ আৰু গুগললৈয়ো প্ৰেৰণ কৰিব।
শনিবাৰে এই কথা প্ৰকাশ পাইছে দেশখনৰ সংবাদ মাধ্যমত।
নেপাল চৰকাৰৰ মন্ত্ৰী পদ্ম আৰিয়ালৰ উদ্ধৃতিৰে সংবাদ মাধ্যমত প্ৰকাশ পাইছে যে দেশখনে সোনকালেই নেপালৰ সংশোধিত মানচিত্ৰখন বিভিন্ন আন্তৰ্জাতিক সংস্থালৈ প্ৰেৰণ কৰিব।
তদুপৰি, নেপাল চৰকাৰে অচিৰেই এখন গ্ৰন্থও প্ৰকাশ কৰিব য’ত কালাপানী, লিপুলেখ আৰু লিম্পিয়াধুৰাক নেপালৰ অংশ হিচাপে দেখুওৱা হৈছে।
নেপালৰ এই শেহতীয়া তৎপৰতাই ভাৰত-নেপালৰ সম্পৰ্কত প্ৰভাৱ পেলোৱাৰ সম্ভাৱনা প্ৰকট হৈ পৰিছে।
বেইজিঙৰ উচটনিতে নেপালে এনেধৰণে ভাৰতৰ সৈতে ফেপেৰি পাতিবলৈ সাহস কৰিছে বুলিও কূটনৈতিক মহলে ধাৰণা কৰিছে।
আন এক বাতৰি অনুসৰি লিপুলেখৰ প্ৰকৃত নিয়ন্ত্ৰণ ৰেখাৰ সমীপত ৰেড আৰ্মি বেটেলিয়ন মোতায়েন কৰা বুলি ভাৰতীয় সেনাই জানিবলৈ দিছে।
আনহাতে, উক্ত অঞ্চলত ভাৰতীয় সেনা আৰু ইণ্ডো-তিব্বেতান বৰ্ডাৰ পুলিচেও চোকা দৃষ্টি ৰাখিছে।