সোমবাৰে সমগ্ৰ উত্তৰ-পূব ছানি বিধেয়ক বিৰোধী নতুন প্ৰতিবাদ আৰম্ভ

উত্তৰ-পূব ছাত্ৰ সংগঠন (নেছ’)এ সোমবাৰে অঞ্চলটোৰ প্ৰত্যেক ৰাজ্যৰ ৰাজধানীত প্ৰস্তাৱিত নাগৰিকত্ব বিধেয়কৰ বিৰুদ্ধে প্ৰতিবাদ জনাব।

সদৌ অসম ছাত্ৰ সন্থা আৰু আন জাতীয়, জনগোষ্ঠীয় সংগঠনৰ উদ্যোগত গুৱাহাটীত এই প্ৰতিবাদ আৰম্ভ হ’ব দিনৰ ১১ বজাৰ পৰা।

খবৰমতে, বিধেয়কবিৰোধী এই প্ৰতিবাদ সোমবাৰৰ পৰা আৰম্ভহে হ’ব, কিন্তু সমগ্ৰ উত্তৰ-পূবজুৰি অনাগত সময়ত ই অব্যাহত থাকিব।

২০১৬ চনত উত্থাপিত বিধেয়কখনতকৈ এইবাৰৰ বিধেয়কত সালসলনি ঘটালেও মানি লোৱা নহ’ব বুলি আছুৱে ইতিপূৰ্বে ঘোষণা কৰিছে।

লোক সভাৰ আগন্তুক শীতকালীন অধিৱেশনত উত্থাপন হ’ব লগা বিধেয়কখন পূৰ্বতকৈ কিছু সালসলনি কৰা হৈছে বুলি মন্ত্ৰী হিমন্ত বিশ্ব শৰ্মাই মন্তব্য কৰিছিল।

শৰ্মাই নতুন বিধেয়কত উত্তৰ-পূবৰ “অনন্য পৰিচয়”ৰ কথা মনত ৰখা হ’ব বুলি জনাইছিল।

উত্তৰ-পূবত প্ৰবল বিধেয়কবিৰোধিতাৰ পিছতো যোৱা লোক সভা নিৰ্বাচনত বিজেপিয়ে বেছিখিনি আসন পোৱাটো ধতৰ্ব্য নহয় বুলি সংগঠনসমূহে ইতিমধ্যে ঘোষণা কৰিছে।

সংখ্যাৰ জোৰেৰে এইক্ষেত্ৰত আগ নাবাঢ়িবলৈ আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্য্যই ইতিমধ্যে শাসক দলটোক সকীয়াই দিছে।

বিধেয়কবিৰোধী আন দুই প্ৰধান সংগঠন অসম জাতীয়তাবাদী যুৱ ছাত্ৰ পৰিষদ আৰু কৃষক মুক্তি সংগ্ৰাম সমিতিয়েও ইয়াৰ বিৰুদ্ধে আন্দোলন ঘোষণা কৰিছে।

কৃষক মুক্তি সংগ্ৰাম সমিতিৰ নেতা অখিল গগৈয়ে বিধেয়ক বিৰোধিতাক “আমাৰ পৰিচয় ৰক্ষাৰ যুঁজ” বুলি অভিহিত কৰি ঐক্যবদ্ধ সংগ্ৰামৰ বাবে আহ্বান জনাইছে।

২০১৬ চনত উত্থাপিত নাগৰিকত্ব বিধেয়কখনে ভাৰতৰ চুবুৰীয়া দেশৰ ধৰ্মীয় সংখ্যালঘুৰ ভাৰতীয়কৰণৰ চৰ্ত শিথিল কৰিব খুজিছিল।