বিৰাট কোহলীৰ ভাগ্য সলনি কৰি দিছিল তেজস্বী যাদৱে! আৰ জে ডিৰ দাবীক লৈ সৰস চৰ্চা
টীম ইণ্ডিয়াৰ অধিনায়ক বিৰাট কোহলীৰ ভাগ্য হেনো সলনি কৰি দিছিল বিহাৰৰ ৰাষ্ট্ৰীয় জনতা দল (আৰজেডি)ৰ মুখ্যমন্ত্ৰী পদৰ প্ৰাৰ্থী তেজস্বী যাদৱে।
এই দাবী কৰিছে তেজস্বী অৰ্থাৎ তেওঁৰ পিতৃ লালু প্ৰসাদৰ দল আৰ জে ডিয়ে।
তেজস্বী যাদৱৰ অধিনায়কত্বত খেলাৰ সময়তে প্ৰথম নিৰ্বাচকসকলৰ দৃষ্টি আহিছিল বিৰাট কোহলী। সেয়ে কোহলীৰ ভাগ্য সলনিৰ কৃতিত্ব তেজস্বীৰ।
কিন্তু আৰজেডিৰ এনে দাবীক লৈ ছচিয়েল মিডিয়াত চলিছে সৰস চৰ্চা।
বৃহস্পতিবাৰে বিৰাট কোহলীৰ জন্মদিন উপলক্ষে বিশ্বৰ বিভিন্ন প্ৰসিদ্ধ ব্যক্তিয়ে তেওঁক শুভেচ্ছা জনায়। ইয়াৰ মাজতে বিহাৰৰ ৰাজনৈতিক দল আৰ জে ডিয়েও টুইটাৰত কোহলীক শুভেচ্ছা জনায়।
টুইটাৰত উল্লেখ কৰে যে তেওঁলোকৰ নেতা তেজস্বী যাদৱৰ নেতৃত্বত খেলাৰ সময়তে হেনো বিৰাট কোহলীৰ ভাগ্য সলনি হৈ যায়।
ইয়াৰ পাছতে ছচিয়েল মিডিয়াত তোলপাৰ লাগে। বিভিন্নজনে প্ৰতিক্ৰিয়া প্ৰকাশ কৰি ব্যংগাত্মক মন্তব্য কৰাৰ লগতে বহু মিমো ছচিয়েল মিডিয়াত ভাইৰেল হৈ পৰে।
উল্লেখ্য যে ২০০০চনত জগমোহন ডালমিয়াৰ নেতৃত্বত বিচিচিআইয়ে দেশৰ বিভিন্ন প্ৰান্তৰ পৰা নতুন প্ৰতিভা তুলি অনাৰ প্ৰচেষ্টা হাতত লৈছিল। সেই সময়ত মুম্বাইৰ অনুৰ্থ ১৬ দলৰ বিৰুদ্ধে খেলা বিৰাটৰ দলৰ অধিনায়ক আছিল তেজস্বী যাদৱ।
সেই মেচতেই হেনো মুখ্য নিৰ্বাচক দিলীপ ভেংচৰকাৰৰ দৃষ্টি কাঢ়িছিল কোহলিয়ে। তেজস্বীয়ে ইয়াৰ পূৰ্বে ঝাৰখণ্ডৰ হৈ ৰঞ্জী দলকো প্ৰতিনিধিত্ব কৰিছিল।
तेजस्वी यादव की कप्तानी में बदली थी विराट कोहली की किस्मत!https://t.co/Xo6UBIKxHF
— Rashtriya Janata Dal (@RJDforIndia) November 5, 2020
আনহাতে, প্ৰথমতে আইপিএলত দিল্লী ডেয়াৰডেভিলছ দলতো আছিল তেজস্বী যাদৱ, যদিও তেওঁৰ এখনো মেচ খেলা নহ’ল।
পাছত ক্ৰিকেটৰ পৰা ৰাজনীতিলৈ ঢাপলি মেলিলে তেজস্বী। বিৰাটৰ জন্মদিনত আৰ জে ডিয়ে কৰা টুইটৰ পাছতে বিষয়টোক লৈ ছচিয়েল মিডিয়াত তৰল মন্তব্যৰ জোৱাৰ উঠে।
বহুতেই ইয়াক বিহাৰ বিধানসভাৰ নিৰ্বাচনৰ মাজত দৃষ্টি আকৰ্ষণৰ এক প্ৰচেষ্টা বুলিও টিপ্পনী কৰিছে।