পুনৰ নতুন নিৰ্দেশনা প্ৰতীক হাজেলাৰ; খচৰাত বাদ পৰাসকলক লৈ ন ন পৰীক্ষা হাজেলাৰ

খচৰাৰ পৰা বাদ পৰা ৪০ লাখ লোকৰ পুনৰ আৱেদন বা দাবী-আপত্তি প্ৰক্ৰিয়াটোক লৈ ন ন পৰীক্ষা-নিৰীক্ষা অব্যাহত ৰাখিছে এন আৰ চিৰ ৰাজ্যিক সমন্বয়ক প্ৰতীক হাজেলাই।

খচৰা প্ৰকাশৰ পিছতে বাদ পৰাসকলৰ পুনৰ আৱেদন বা দাবী-আপত্তি প্ৰক্ৰিয়াত পূৰ্বৰ ১৫ বিধ নথিৰ ৫ বিধৰ বৈধতা কৰ্তনৰ প্ৰস্তাৱ আগ বঢ়াই তুমুল বিতৰ্ক আৰু অনাহক বেমেজালিৰ সৃষ্টি কৰাৰ পিছত এইবাৰ হাজেলাৰ আন এটা নিৰ্দেশনাই পুনৰ একে পৰিস্থিতিৰ সৃষ্টি কৰাৰ সম্ভাৱনা আছে।

জানিব পৰামতে, দাবী-আপত্তিৰ প্ৰক্ৰিয়াত আৱেদনকাৰীয়ে ২০১৫ চনৰ ৩১ আগষ্টৰ পাছত ইচ্ছ্যু কৰা কোনো নথি দিলেও সেয়া বৈধ নথি হিচাপে ধৰা নহ’ব। এইবোৰ বৈধ নথি হিচাপে নধৰিবলৈ সেৱা কেন্দ্ৰসমূহলৈ এন আৰ চি কৰ্তৃপক্ষই নতুন নিৰ্দেশনা দিছে বুলি গম পোৱা গৈছে।

এন আৰ চি কৰ্তৃপক্ষৰ এই নতুন নিৰ্দেশনাই খচৰাৰ পৰা বাদ পৰাসকলৰ পুনৰ আৱেদন বা দাবী-আপত্তিৰ ক্ষেত্ৰত জটিলতাৰ সৃষ্টি কৰিব বুলি অনুমান কৰা হৈছে।

কাৰণ বহুতো বিবাহিত মহিলাৰ নাম খচৰাৰ পৰা বাদ পৰি ৰৈছে আৰু এইসকলে তেওঁলোকৰ পিতৃৰ গাৱঁৰ পঞ্চায়তৰ পৰা বিবাহৰ পূৰ্বৰ বাসিন্দা হিচাপে প্ৰমাণ পত্ৰ উলিয়াইছে। এইবোৰৰ বহু সংখ্যক প্ৰমাণ পত্ৰ ২০১৬ চনত উলিওৱা হৈছে আৰু লিগেচি ডাটাৰ  সৈতে নিজৰ যোগসূত্ৰৰ সত্যতা প্ৰতিপন্ন কৰিবলৈ দাখিল কৰিছে বা কৰিব।

তাৰোপৰি শিশুৰ জন্মৰ প্ৰমাণ পত্ৰৰ ক্ষেত্ৰতো এই নতুন চৰ্তই সমস্যাৰ সৃষ্টি কৰিব পাৰে।

যদি এই বিষয়টো অধিক সাৱধানতাৰে বিবেচনা কৰা নহয়, তেন্তে পুনৰ বহু সংখ্যক থলুৱা লোকৰ নাম এন আৰ চিৰ পৰা বাদ পৰাৰ শংকা প্ৰকাশ কৰিছে সচেতন ৰাইজে।