শেষৰজন পজিটিভ ৰোগীও হৈ উঠিল সুস্থ; ৫মাহৰ ভিতৰতে দেশখনে বিদায় দিলে কৰ’নাক
কৰ’না আক্ৰান্ত শেষজন ৰোগীও সুস্থ হৈ উঠাৰ লগে লগে নিউজিলেণ্ড হৈ পৰিল বিশ্বর আন এখন কৰ’না মুক্ত দেশ।
নতুনকৈ দেশখনত কোনো কোভিড-১৯ পজিটিভৰ ঘটনা পোহৰলৈ অহা নাই।
যোৱা ২৮ ফেব্ৰুৱাৰিৰ পাছত প্ৰথমবাৰৰ বাবে বিগত ১৭ দিনত দেশখনত এটাও কোভিড-১৯ পজিটিভৰ ঘটনা পোৱা নাই।
প্ৰধান মন্ত্ৰী জেসিণ্ডা অৰ্ডাণে শীঘ্ৰেই কৰ’না প্ৰতিৰোধৰ বাবে সীমান্তত বলবৎ কৰা কঠোৰ নিষেধাজ্ঞা প্ৰত্যাহাৰ কৰাৰ সম্ভাৱনা আছে।
কৰ’না সংক্ৰমণৰ ঘটনা আৰম্ভ হোৱাৰ সময়তে যোৱা ২৫ মাৰ্চৰ পৰা নিউজিলেণ্ডত লকডাউন ঘোষণা কৰা হৈছিল।
তেতিয়াৰে পৰা দেশখনত মুঠ ২২জন লোকৰ কৰ’নাৰ ফলত মৃত্যু হৈছে আৰু মুঠতে ১,৫০০ লোক কৰ’নাত আক্ৰান্ত হৈছিল।
দেশখনৰ অকলেণ্ডৰ বাসিন্দা ৫০ বৰ্ষীয় কৰ’না আক্ৰান্ত শেষৰজন ৰোগী এতিয়া সম্পূৰ্ণ সুস্থ হৈ উঠিছে। ইয়াৰ ফলত নিউজিলেণ্ডত এতিয়া আৰু কোনো কৰ’না আক্ৰান্ত ৰোগী নাই।
শেহতীয়া তথ্য অনুসৰি, বিশ্বত বৰ্তমান কৰ’না আক্ৰান্ত লোকৰ সংথ্যা হৈছে ৭,০০৬,৪৩৬জন। ইয়াৰ ভিতৰত ৪,০২৬৯৯জন লোকৰ মৃত্যু ঘটিছে।
বৰ্তমান কৰ’নাৰ দ্বাৰা অধিক আক্ৰান্ত দেশকেইখনৰ ভিতৰত আছে আমেৰিকা যুক্তৰাষ্ট্ৰ, ব্ৰাজিল, ৰাছিয়া, ব্ৰিটেইন আৰু ভাৰত।