টি-২০ বিশ্বকাপৰ ছেমি ফাইনেলৰ দিশে ধাৱমান নিউজিলেণ্ড, সংকটত পাকিস্তান

চলিত টি-২০ বিশ্বকাপত নাটকীয় পাকলৈছে ছেমি ফাইনেলৰ যুঁজখনে। বৰ্তমানৰ পৰিস্থিতি অনুসৰি নিউজিলেণ্ডৰ বাবে ছেমি ফাইনেলৰ পথ প্ৰশস্ত হোৱা দেখা গৈছে যদিও আয়োজক দেশ শ্ৰীলংকাৰ বিশ্বকাপ অভিযানৰ ইয়াতেই যৱনিকা পৰিল। ইপিনে কিৱিবাহিনীৰ এই জয়ৰ পাছত পাকিস্তানৰ ছেমি ফাইনেলত প্ৰৱেশ কৰাৰ আশা যথেষ্ট ম্লান হৈ পৰিছে। গ্ৰুপ পৰ্যায়ত সুন্দৰ প্ৰদৰ্শন কৰি ছুপাৰ এইটত স্থান নিশ্চিত কৰা শ্ৰীলংকাই নিজৰ ধাৰাবাহিকতা ৰক্ষা কৰাত ব্যৰ্থ হ’ল। অষ্ট্ৰেলিয়াক পৰাস্ত কৰি আত্মবিশ্বাসী হৈ থকা লংকা বাহিনী বুধবাৰে নিউজিলেণ্ডৰ হাতত শোচনীয়ভাৱে পৰাস্ত হয়। ইয়াৰ লগে লগে চলিত বিশ্বকাপৰ ছুপাৰ এইট পৰ্যায়ৰ পৰা বাহিৰ হোৱা প্ৰথমটো দল হিচাপে পৰিগণিত হয় দছুন শনাকাৰ দলটো। শ্ৰীলংকাৰ এই ব্যৰ্থতাৰ মূল কাৰণ হিচাপে চিহিত হৈছে তেওঁলোকৰ দুৰ্বল বেটিং প্ৰদৰ্শন।

কলম্বোত অনুষ্ঠিত হোৱা এই গুৰুত্বপূৰ্ণ মেচখনত শ্ৰীলংকাই টছত জয়লাভ কৰি প্ৰথমে ফিল্ডিং কৰাৰ সিদ্ধান্ত লৈছিল। খেলখনৰ আৰম্ভণি শ্ৰীলংকাৰ বাবে যথেষ্ট আশাপ্ৰদ আছিল। মহেশ থাক্ষনা আৰু দুষমান চমিৰাৰ নিয়ন্ত্ৰিত বলিঙৰ সন্মুখত নিউজিলেণ্ডৰ বেটছমেনসকল অসহায় হৈ পৰিছিল। প্ৰথম দহ অভাৰত কিৱিদলে মাত্ৰ ৭৫ ৰানহে সংগ্ৰহ কৰিবলৈ সক্ষম হৈছিল আৰু ফিন এলেনকে ধৰি তিনিজন শীৰ্ষ পৰ্যায়ৰ বেটছমেন পেভিলিয়নলৈ উভতি গৈছিল। খেলখনৰ ১৩ নং অভাৰ চলি থকাৰ সময়ত নিউজিলেণ্ডৰ অৱস্থা অধিক শোচনীয় হৈ পৰে আৰু মাত্ৰ ৮৪ ৰানতে তেওঁলোকে ৬টা উইকেট হেৰুৱায়। সেই সময়ত এনে লাগিছিল যেন নিউজিলেণ্ড অতি কম স্ক’ৰতে থমকি ৰ’ব।

কিন্তু খেলখনৰ মোৰ সলাই দিয়ে নিউজিলেণ্ডৰ অধিনায়ক মিচেল ছাণ্টনাৰে। এগৰাকী স্পিনাৰ হিচাপে পৰিচিত হ’লেও সংকটৰ সময়ত তেওঁ নিজৰ বেটিং দক্ষতাৰ পৰিচয় দিয়ে। তেওঁ মাত্ৰ ২৬টা বলত বিস্ফোৰক ৪৭ ৰানৰ এটা ইনিংছ খেলে। তেওঁক যোগ্য সংগ দি ক’ল মেককাঞ্চিয়েও ২৩টা বলত ৩১ ৰান সংগ্ৰহ কৰে। এই গুৰুত্বপূৰ্ণ অংশীদাৰিত্বৰ বলত নিউজিলেণ্ডে নিৰ্ধাৰিত অভাৰত ১৬৮ ৰানৰ এটা সন্মানীয় স্ক’ৰ থিয় কৰায়। ১৬৯ ৰানৰ লক্ষ্য অনুসৰণ কৰিবলৈ নামি শ্ৰীলংকাই আৰম্ভণিতেই উজুটি খায়। অপেনাৰ পাথুম নিশংকা প্ৰথমটো বলতে আউট হোৱাৰ পাছত দলটোৰ বেটিং বিপৰ্যয় স্পষ্ট হৈ পৰে। কুশল মেণ্ডিছ, চৰিথ আছালংকা বা অধিনায়ক শনাকায়োদলক বিপদৰ পৰা উদ্ধাৰ কৰিব নোৱাৰিলে। কামিন্দু মেণ্ডিছে সৰ্বাধিক ৩১ ৰান কৰাৰ বিপৰীতে শেষৰ ফালে দুনিথ ৱেলালেগে কৰা সামান্য প্ৰয়াসৰ বাবে লংকা বাহিনীয়ে ১০০ ৰানৰ সীমা অতিক্ৰম কৰিবলৈ সক্ষম হয়। অৱশেষত নিউজিলেণ্ডে ৬১ ৰাণৰ বৃহৎ ব্যৱধানত জয়লাভ কৰি ছেমি ফাইনেলৰ দৌৰত আগবাঢ়ি যায়।