স্কটলেণ্ডৰ বিৰুদ্ধে মেচত আৰম্ভণিৰ পৰা নাথাকিব পাৰে নেইমাৰঃ ৰাফিনহাৰ স্থানত কাক খেলাব আঞ্চেলোত্তিয়ে

মায়ামিত এতিয়া সম্পূৰ্ণ ব্ৰাজিলৰ পৰিৱেশ। ৰাস্তাই ঘাটে ব্ৰাজিলৰ মানুহৰ প্ৰিয় খাদ্য পোৱা গৈছে আৰু মায়ামি বিচ্ছত চলিছে সাম্বা নৃত্য। মায়ামিৰ হাৰ্ডৰক ষ্টেডিয়ামত স্কটলেণ্ডৰ বিৰুদ্ধে খেলিবলৈ ব্ৰাজিলৰ দলটো সাজু হৈছে। সকলোৰে মনত এটাই প্ৰশ্ন এই মেচখনত নেইমাৰে আৰম্ভণিৰ পৰা খেলিবনে। প্ৰশিক্ষণ শিবিৰত নেইমাৰক সম্পূৰ্ণ সুস্থ দেখা গৈছে। তেওঁ আন খেলুৱৈসকলৰ লগতে দৌৰিছে আৰু অনুশীলন কৰিছে। তেওঁৰ ভৰিৰ আঘাতৰ কোনো সমস্যা দেখা যোৱা নাই।

খেলুৱৈ হিচাপে সম্পূৰ্ণ সুস্থ হ‘লেও মেচ খেলাৰ ফিটনেছ আহিবলৈ তেওঁক সময় লাগিব। সেয়েহে প্ৰশিক্ষক আঞ্চেলোত্তিয়ে স্কটলেণ্ডৰ বিৰুদ্ধে আৰম্ভণিৰ পৰাই নেইমাৰক খেলোৱাৰ সম্ভাৱনা কম। বৰঞ্চ আঘাতপ্ৰাপ্ত ৰাফিনহাৰ সলনি কাক খেলাব সেইটোহে প্ৰশিক্ষকৰ বাবে চিন্তাৰ বিষয় হৈ পৰিছে। এইবাৰৰ বিশ্বকাপত আঞ্চেলোত্তিয়ে নেইমাৰক উইংগাৰৰ সলনি চেকেণ্ড ষ্ট্ৰাইকাৰ হিচাপে খেলোৱাৰ পৰিকল্পনা কৰিছে। ৰাফিনহাৰ স্থানত লুইজ হেনৰিকে বা ৰায়ানক খেলোৱাৰ কথা চিন্তা কৰা হৈছে।

মায়ামি চহৰখনক মেজিক চিটি বুলিও কোৱা হয়। ফুটবল অনুৰাগীসকলে আশা কৰিছে যে এই মেজিক চিটিত নেইমাৰে পুনৰ নিজৰ মেজিক দেখুৱাবলৈ সক্ষম হ‘ব। প্ৰশিক্ষকে প্ৰথমে স্কটলেণ্ডক হৰুৱাই পৰৱৰ্তী ৰাউণ্ড নিশ্চিত কৰিব বিচাৰিছে আৰু তাৰ পাছতহে প্ৰয়োজন অনুসৰি নেইমাৰক খেলপথাৰলৈ নমোৱাৰ সিদ্ধান্ত ল’ব।