সোণৰ চোৰাং সৰবৰাহৰ গোচৰ: গুৱাহাটীৰ ৪ স্থানত ‘নিয়া’ৰ তালাচী

দেশ জুৰি জোকাৰণিৰ সৃষ্টি কৰা নতুন দিল্লীৰ  অবৈধ সোণ সৰবৰাহৰ গোচৰ সন্দৰ্ভত  আজি ৰাষ্ট্ৰীয় তদন্তকাৰী সংস্থা নিয়াই গুৱাহাটীৰ চাৰি স্থানৰ লগতে মহাৰাষ্ট্ৰ ছাংলীত তালাচী  অভিযান চলায়।

নতুন দিল্লীত নিয়াৰ শীৰ্ষ সূত্ৰই নৰ্থ ইষ্ট নাওক জনোৱা মতে গুৱাহাটীৰ চাৰি স্থানত চলোৱা তালাচীৰ সময়ত বহু আপত্তিজনক নথি-পত্ৰ উদ্ধাৰ কৰা হৈছে।

লগতে ইলেকট্ৰনিক সা-সঁজুলিও জব্দ কৰা হৈছে। নিয়াৰ সূত্ৰই প্ৰকাশ কৰা অনুসৰি যিবোৰ স্থানত তালাচী চলোৱা হৈছে সেই স্থানৰ গৰাকীৰ সৈতে নেপাল, ম্যাননাৰ আদি স্থানৰ চোৰাং সোণ ব্যবসায়ীৰ সম্পৰ্ক থকাৰ সন্দেহ কৰা হৈছে।

উল্লেখ্য চলিত বৰ্ষৰ ছেপ্তেম্বৰ মাহত নতুন দিল্লীৰ ৰে’ল ষ্টেছনত ৮৩.৬২১ কিলোগ্ৰাম চোৰাং ভাবে সৰবৰাহ কৰা সোণ জব্দ কৰা হৈছিল।

এই সোণ খিনিৰ মূল্য প্ৰায় ৪২.৮৯ কোটি টকা হ’ব বুলি ধাৰণা কৰা হৈছে। নিয়াই সোণ খিনি জব্দ কৰাৰ পিছতে RC-32/2020/NIA/DLI নন্বৰত গোচৰ ৰুজু কৰিছিল আৰু ৮ জন লোকক এই সন্দৰ্ভত গ্ৰেপ্তাৰো কৰিছিল।

সোণ খিনি ম্যানমাৰ, ভূটান আৰু নেপালৰ পৰা গুৱাহাটী হৈ নতুন দিল্লীলৈ নিয়া হৈছিল বুলি নিয়াৰ শীৰ্ষ বিষয়াই প্ৰকাশ কৰিছে।

বিষয়া গৰাকীয়ে লগতে কয় যে জম্মু-কাশ্মীৰৰ দৰে ৰাজ্যত  একাংশ এনজিঅ’ই দাতব্য প্ৰতিষ্ঠানৰ নামত ধন সংগ্ৰহ কৰি সেই ধন সন্ত্ৰাসবাদী কাৰ্যকলাপত ব্যৱহাৰ কৰিবলৈ প্ৰেৰণ কৰে।