অৰুণাচলৰ বিধায়ক তিৰং আবহৰ হত্যাকাণ্ড; NSCN (IM)ৰ ৪ কেডাৰৰ বিৰুদ্ধে চাৰ্জশ্বীট

অৰুণাচল প্ৰদেশৰ পশ্চিম খুনচা বিধানসভাৰ সমষ্টিৰ বিধায়ক তিৰং আবহৰ হত্যাকাণ্ডত জড়িত থকাৰ অভিযোগত ৰাষ্ট্ৰীয় অনুসন্ধানকাৰী সংস্থা নিয়াই ২৮ জানুৱাৰীত NSCN (IM)ৰ ৪ গৰাৰী কেডাৰৰ বিৰুদ্ধে চাৰ্জশ্বীট দাখিল কৰিছে।

চাৰ্জশ্বীট দাখিল হোৱা NSCN (IM)ৰ কেডাৰ কেইগৰাকী হৈছে লাকিন মাশ্বাংভা, জয় কিষাণ শৰ্মা, য়াংটে যোছাহাম আৰু নাপং জেংপি।

তেওঁলোকক ভাৰতীয় দণ্ডবিধি, অস্ত্ৰ আইন আৰু বেআইনী কাৰ্যকলাপ (প্ৰতিৰোধ) আইনৰ বিভিন্ন ধাৰাৰ অধীনত দোষী অভিযুক্ত কৰা হৈছে।

উল্লেখযোগ্য যে ২০১৯ চনৰ ২১ মে’ত অৰুণাচলৰ খুনচা সমষ্টিৰ NPP দলৰ বিধায়ক তিৰং আবহ আৰু তেওঁৰ পুত্ৰকে ধৰি ১১ গৰাকী লোকক টিৰাপ জিলাৰ পানছুম থং গাঁৱত গুলীয়াই হত্যা কৰা হৈছিল।

উল্লেখযোগ্য যে যোৱা জুন মাহৰ পৰা ৰাষ্ট্ৰীয় অনুসন্ধানকাৰী সংস্থা নিয়াই এই ঘটনাটোৰ তদন্ত চলাই আছে।