নৈশ স্বপ্নৰ নিৰ্দেশত চলমান অখিল গগৈ!

ৰাতি দেখা সপোন মতে চলে অখিল গগৈ! আনে নক’লেও অসম বিজেপিৰ মতে এই কথাই সত্য কৃষক মুক্তি সংগ্ৰাম সমিতিৰ নেতাজনৰ ক্ষেত্ৰত।

অসমৰ বিজেপি-আৰ এচ এচ নেতা আৰু খোদ মুখ্য মন্ত্ৰীৰ কাৰ্য্যালয় চিন্দিকে’টত জৰিত বুলি শেহতীয়াকৈ কৰা অভিযোগৰ বাবে কৃষক মুক্তিৰ নেতাজনক শুকুৰবাৰে এইদৰে উভটি ধৰিছে ৰাজ্যিক বিজেপিয়ে।

“অখিল গগৈয়ে ৰাতি যি সপোন দেখে সেয়াই দিনৰ বক্তব্যত দাঙি ধৰে। তেওঁৰ ওচৰত থকা তথ্য মুখ্য মন্ত্ৰীৰ কাৰ্য্যালয় তথা ৰাজ্যিক বিজেপিৰ কাৰ্য্যালয়ত দাখিল কৰক,” সংবাদমেলত দলটোৰ ৰাজ্যিক মুখপাত্ৰ মুমিনুল আৱালৰ মন্তব্য।

আৱালৰ অনুৰূপ মন্তব্যৰে দলটোৰ বোকাজানৰ বিধায়ক নুমল মমিনেও চিন্দিকে’ট সন্দৰ্ভত গগৈৰ অভিযোগ “ভিত্তিহীন আৰু নিৰৰ্থক” বুলি দাবী কৰি তথ্য থাকিলে কৃষক মুক্তিৰ নেতাজনক আদালতৰ কাষ চাপিবলৈ পৰামৰ্শ আগবঢ়াইছে।

গগৈয়ে খোদ মুখ্য মন্ত্ৰী কাৰ্য্যালয়ৰ পৰা চিন্দিকে’ট চলা বুলি দাবী কৰিছিল।

“মুখ্য মন্ত্ৰী কাৰ্য্যালয়ৰ পৰা পোনপটীয়াকৈ চলি আছে চিণ্ডিকে’টৰাজ। মুখ্য মন্ত্ৰীৰ অতিকৈ ঘনিষ্ঠ সদস্য সচিব আৰু বিজেপিৰ ৰাজ্যিক সাধাৰণ সম্পাদক আৰু নিজৰ বিশেষ কৰ্তব্যৰত বিষয়া তিনিচুকীয়াৰ কয়লা ছিণ্ডিকেটৰ সৈতে জৰিত থকাৰ অভিযোগ উঠিছে,” শাসকীয় বিধায়ক ভাস্কৰ শৰ্মা আৰু বলীন চেতিয়া মাৰ্ঘেৰিটাৰ কয়লা চিন্দিকে’টত জৰিত বুলি দাবী কৰি বুধবাৰে সংবাদমেলযোগে এই মন্তব্য কৰিছিল গগৈয়ে।

তাৰোপৰি ৰাজ্যিক স্বাস্থ্য মন্ত্ৰী পিযুষ হাজৰিকাই পূৰ্বৰ দৰেই শাক-পাচলি, ফলমূল আৰু পান মাছৰ চিন্দিকে’ট চলোৱাৰ লগতে হাজৰিকাৰ সৈতে স্বাস্থ্য, বিত্ত মন্ত্ৰী হিমন্ত বিশ্ব শৰ্মা বাংলাদেশলৈ গৰু সৰবৰাহত জৰিত বুলিও তেওঁ দাবী কৰিছিল।

মন্ত্ৰী হিমন্ত বিশ্ব শৰ্মাৰ সমষ্টিৰ মান্দাকাটা পাহাৰ “গোটে গোটে কাটি শেষ কৰি দিয়া হৈছে” বুলি দাবী কৰি গগৈয়ে অভিযোগ কৰিছিল যে এই সন্দৰ্ভত আজি পৰ্য্যন্ত কোনো তদন্ত হোৱা নাই।

পৰৱৰ্তী সময়ত কয়লা চিন্দিকে’টৰ “অধিক তথ্য” ফাদিল কৰা হ’ব বুলি সংবাদমেলত ঘোষণা কৰিছিল গগৈয়ে।