বেলুচিস্তানত বাছৰ পৰা নমাই নি ৯জন যাত্ৰীক গুলীয়াই হত্যা উগ্ৰপন্থীৰ; আক্ৰমণত জড়িত কোন?

বেলুচিস্তানত দুখন বাছৰ পৰা নমাই ৯ জন যাত্ৰীক গুলীয়াই হত্যা কৰে উগ্ৰপন্থীয়ে। বৃহস্পতিবাৰে নিশা যাত্ৰীসকলক প্ৰথমে অপহৰণ কৰাৰ পিছত গুলীয়াই হত্যা কৰা হয়। বেলুচিস্তানৰ জোহাব আৰু লোৰাৰাই জিলাৰ মাজৰ সুৰ-ডাকাই অঞ্চলত সংঘটিত হয় এই নৃশংস হত্যাকাণ্ড।

জোহাব অঞ্চলৰ সহকাৰী আয়ুক্ত নবীদ আলমে জনোৱা মতে, নিহত আটাইকেইজন লোক পাকিস্তানৰ পঞ্জাৱ প্ৰদেশৰ। বেলুচিস্তান চৰকাৰৰ মুখপাত্ৰ শ্বাহিদ ৰিন্দে কয় যে এই হত্যাকাণ্ডত ‘ফিতনা আল হিন্দুস্তান’ নামৰ এটা উগ্ৰপন্থী সংগঠন জড়িত হৈ আছে।

বৃহস্পতিবাৰে নিশা উগ্ৰপন্থীয়ে কাকাত, মস্তুংগ আৰু সুৰ-ডাকাই অঞ্চলত আক্ৰমণ চলায়। উগ্ৰপন্থীয়ে সুৰ-ডাকাই অঞ্চলত দুখন বাছৰ পৰা ১০ জন যাত্ৰীক নমাই আনিছিল। ৯ জন লোকক গুলীয়াই হত্যা কৰা হয়।

উগ্ৰপন্থীয়ে আৰু কেইজনমান যাত্ৰীক অপহৰণ কৰিছে নে নাই সেই সন্দৰ্ভত অনুসন্ধান আৰম্ভ কৰা হৈছে। উগ্ৰপন্থীক বিচাৰি কম্বিং অপাৰেচন অব্যাহত আছে। তেওঁ দাবী কৰে যে কাকাত আৰু মস্তুংগ অঞ্চলত উগ্ৰপন্থীৰ আক্ৰমণ নিৰাপত্তা বাহিনীয়ে বিফল কৰে।

সূত্ৰৰ পৰা জানিব পৰা মতে, কুৱেটাৰ পৰা লাহোৰলৈ ৰাষ্ট্ৰীয় ঘাইপথ ৭০ত দুখন বাছত গৈ আছিল কেইবাজনো যাত্ৰী। সুৰ-ডাকাই অঞ্চলত বন্দুক দেখুৱাই দুয়োখন বাছ ৰখাই দিয়ে সশস্ত্ৰ উগ্ৰপন্থীয়ে। হাতত অত্যাধুনিক ৰাইফল লৈ বাছ দুখনত উঠি যাত্ৰীসকলক পৰিচয় পত্ৰ দেখুৱাবলৈ কয়।

ইয়াৰ পিছতে এখন বাছৰ পৰা সাতজন আৰু আনখন বাছৰ পৰা তিনিজনক লৈ গৈ সেই স্থানৰ পৰা কিছু দূৰলৈ লৈ যায়। যাত্ৰীকেইজনক নিয়াৰ পূৰ্বে উগ্ৰপন্থীয়ে বাছ চালক দুজনক সেই অঞ্চল এৰি যাবলৈ কয়। উগ্ৰপন্থীৰ পৰা কেনেবাকৈ পলায়ন কৰা এজন যাত্ৰীয়ে আৰক্ষীক জনাইছে যে তেওঁ বন্দুকৰ গুলীৰ শব্দ শুনিছিল।

আৰক্ষী আৰু স্থানীয় সূত্ৰৰ মতে, বাছ যাত্ৰীসকলৰ পৰিচয় পত্ৰ পৰীক্ষা কৰাৰ সময়ত উগ্ৰপন্থীয়ে নিৰ্বাচিতভাৱে পঞ্জাৱ প্ৰদেশৰ কোন কোন সেইটো পৰীক্ষা কৰি আছিল। বেলুচিস্তানৰ বিভিন্ন ঘাইপথত যাত্ৰীবাহী বাছত আক্ৰমণ চলোৱাটো প্ৰথম নহয়। ইয়াৰ পূৰ্বেও পঞ্জাৱ প্ৰদেশৰ লোকক লক্ষ্য কৰি লোৱা হৈছে।

শুকুৰবাৰে পুৱালৈকে কোনো উগ্ৰপন্থী সংগঠনে এই হত্যাকাণ্ডৰ দায়িত্ব স্বীকাৰ কৰা নাই। অৱশ্যে পাকিস্তান চৰকাৰৰ এক সূত্ৰই প্ৰকাশ কৰিছে যে বেলুচিস্তান লিবাৰেশ্যন ফ্ৰণ্টে এই হত্যাকাণ্ডৰ দায়িত্ব স্বীকাৰ কৰিছে। তেওঁলোকে ঘাইপথ অৱৰোধ কৰি মুছাখিল-মাখতাৰ আৰু খাজুৰি অঞ্চলৰ মাজত যাত্ৰীকেইজনক গুলীয়াই হত্যা কৰে।