এক ৰাজহুৱা অনুষ্ঠানত জাতীয় সংগীতক অপমান বিহাৰৰ মুখ্যমন্ত্ৰী নীতিশ কুমাৰৰ

পাটনাৰ পাটলীপুত্ৰ ক্ৰীড়া কমপ্লেক্সত অনুষ্ঠিত ছেপাকটাক্ৰ’ বিশ্বকাপৰ উদ্বোধনী অনুষ্ঠানত ৰাষ্ট্ৰীয় সংগীতৰ সময়ত অসৎ আচৰণ কৰি  চৰ্চাত  আছে  বিহাৰৰ মুখ্যমন্ত্ৰী নীতিশ কুমাৰ। মুখ্যমন্ত্ৰী এগৰাকীৰ এনে আচৰণৰ বাবে পুনৰ বিৰোধীৰ আক্ৰমণৰ লক্ষ্য  হৈ পৰিছে।

সামাজিক মাধ্যমত প্ৰচাৰিত এক ভিডিঅ’ত নিতিশ কুমাৰে জাতীয় সংগীত পৰিৱেশণ কৰি থকাৰ সময়তে আই এ এছ বিষয়া তথা প্ৰধান সম্পাদক দীপক কুমাৰৰ সৈতে কথা পতা দেখা গৈছে, আনকি বিষয়াজনৰ কান্ধত থপৰিয়াই থপৰিয়াই দৰ্শকৰ মাজৰ পৰা কোনোবা এজনক সম্ভাষণ জনোৱা পৰিলক্ষিত হৈছিল। এগৰাকী মুখ্যমন্ত্ৰীৰ এন আচৰণে সকলোকে স্তম্ভিত কৰি তুলিছে। ইয়াৰ বিপৰিতে কেন্দ্ৰীয় মন্ত্ৰী জিতন ৰাম মাঞ্জীয়ে নীতিশ কুমাৰক সমৰ্থন কৰিহে মন্তব্য প্ৰদান কৰা ।

বিৰোধী দলপতি তেজস্বী যাদৱে এই ঘটনাক গৰিহণা দি মুখ্যমন্ত্ৰীগৰাকীয়ে ৰাজ্য আৰু জাতি উভয়কে অপমান কৰাৰ অভিযোগ উত্থাপন কৰে। এই ভিডিঅ’টো ছ’চিয়েল মিডিয়াত শ্বেয়াৰ কৰি যাদৱে মুখ্যমন্ত্ৰীগৰাকীৰ আচৰণক লৈ প্ৰশ্ন উত্থাপন হৈছে।

উল্লেখ্য যে নীতিশ কুমাৰে পূৰ্বেও যুৱক-যুৱতী, ছাত্ৰ-ছাত্ৰী, মহিলা আৰু বৃদ্ধক অপমান কৰাকে ধৰি বিভিন্ন সময়ত বিতিৰ্কৰ সৃষ্টি কৰি আহিছে। প্ৰশ্ন হয় যে জাতীয় সংগীতক অবমাননা কৰা বাবে বিহিত ব্যৱস্থা গ্ৰহণ কৰা হ’ব নে?