বৃদ্ধি নহয় লকডাউনৰ সময়সীমা; বিকল্প উপায়ৰ চিন্তা কৰিব চৰকাৰে : হিমন্ত বিশ্ব শৰ্মা

যোৱা ২৪ মাৰ্চৰ পৰা ১৪ এপ্ৰিললৈকে দেশৰ প্ৰধান মন্ত্ৰী নৰেন্দ্ৰ মোদীয়ে ঘোষণা কৰা ২১ দিনীয়া লকডাউনৰ সীমা বৃদ্ধি হোৱাৰ সম্ভাৱনা নাই। এই কথা সদৰী কৰিছে ৰাজ্যৰ স্বাস্থ্য মন্ত্ৰী ডঃ হিমন্ত বিশ্ব শৰ্মাই।

লকডাউনৰ বিকল্প কি হ’ব পাৰে তাৰ বিষয়ে চৰকাৰে চিন্তা চৰ্চা কৰি আছে বুলিও সংবাদমাধ্যমৰ আগত মন্ত্ৰীগৰাকীয়ে জনায়।

যোৰহাট মেডিকেল কলেজ পৰিদৰ্শন কৰা কালত মন্ত্ৰীগৰাকীয়ে কয়, “মই ভাবো লকডাউন বৃদ্ধি নহয়, কিন্তু লকডাউনৰ বিকল্প কি হ’ব সেই বিষয়ে চৰকাৰে চিন্তা চৰ্চা আৰম্ভ কৰিছে।”

তেওঁ লগতে কয়, “প্ৰধান মন্ত্ৰীয়ে কৈছে যে তোমালোকে ৰাইজৰ লগত কথা পাতা। প্ৰত্যেকখন ৰাজ্যকে কৈছে যে আপোনালোকে ডাক্তৰ, বুদ্ধিজীৱী, সমাজকৰ্মী সকলোৰে লগত কথা পাতক।”

ইপিনে লকডাউনৰ বিকল্প কেনে হ’ব পাৰে সেই সম্পৰ্কত মন্তব্য কৰি মন্ত্ৰী হিমন্তই কয়, “বিদ্যালয়, বিশ্ববিদ্যালয়সমূহ লকডাউন শেষ হোৱাৰ পাছতো বন্ধ ৰাখিব পাৰো নেকি? কাৰ্যালয় সমূহত ৫০ শতাংশ উপস্থিতি কৰি ৰাখিব পাৰো নেকি? ধৰি ল’লো এটা নিৰ্দেশ দিয়া হ’ব কৰ’না থকালৈকে বদলি নিযুক্তি বন্ধ হৈ থাকিব।”

এনেধৰণে চৰকাৰী নীতি-নিৰ্দেশনাৰ মাজেৰে বহু লোকৰ যাতায়ত গমন বন্ধ কৰিব পাৰি বুলি উল্লেখ কৰি তেওঁ লগতে কয়, “চিনেমা হল, বিউটি পাৰ্লাৰ, লাইব্ৰেৰী, সাপ্তাহিক হাট-বজাৰ বন্ধ ৰাখিব। লাগিলে দোকানৰ সময় পুৱা ৫ বজাৰ পৰা ১২ বজালৈকে খোলা থাকক… কিন্তু একেলগে যাতে মানুহ গোট খাই থাকিব নোৱাৰে।”

মন্ত্ৰীগৰাকীয়ে লগতে কয়, “জীৱনটো খোলা যদিও নিজেই নিজৰ প্ৰতিবন্ধকতা ল’ব লাগিব।”