দন্ত চিকিৎসকক সাঙুৰি বিতৰ্কিত মন্তব্য কৰা আঙুৰলতা ডেকাক উভতি ধৰিলে দলৰে বিধায়ক নোমল মমিনে

যোৱা ১৫ ছেপ্তেম্বৰৰ দিনা বিজেপি মহিলা মৰ্চাৰ ৰাজ্যিক সভানেত্ৰী তথা প্ৰাক্তন বিধায়িকা আঙুৰলতা ডেকাই সাংবাদিকে NCRB ৰ তথ্য সন্দৰ্ভত মহিলাৰ ওপৰত হোৱা দলবদ্ধ ধৰ্ষণৰ ক্ষেত্ৰত অসমৰ তৃতীয় স্থানক লৈ প্ৰশ্ন কৰাত কথাৰ প্ৰসংগত দন্ত চিকিৎসকে যৌন অতিশায্য চলোৱা বুলি উল্লেখ কৰিছিল।

তেওঁ কৈছিল ‘১৩-১৪ বছৰীয়া কিশোৰী এগৰাকীয়ে যেতিয়া দাঁতৰ চিকিৎসকৰ ওচৰলৈ যায় তেতিয়া চিকিৎসকজনে তেওঁৰ কিলাকুটি বুকুত থৈ চিকিৎসা কৰে। সেই কিশোৰীগৰাকীয়ে সেই সময়ত ভয়-সংকোচ কৰে বা মাক-দেউতাকক ক’বলৈ সংকোচ কৰে। এই সংকোচবোৰ ভাঙিব লাগিব।‘

ইয়াৰ পাছতে বিষয়টোক কেন্দ্ৰ কৰি ছ’চিয়েল মিডিয়াত তীব্ৰ প্ৰতিক্ৰিয়াৰ সৃষ্টি হৈছিল।

আনকি বিষয়টোক লৈ বিজেপিৰ বিধায়ক তথা বিধানসভাৰ উপাধ্যক্ষ ডাঃ নোমল মমিনেও টুইটাৰযোগে প্ৰতিক্ৰিয়া প্ৰকাশ কৰিছিল।

তেওঁ লিখি কৈছিল ‘এইটো অতি দুৰ্ভাগ্যজনক কথা যে অসমৰ এগৰাকী নেত্ৰীয়ে দন্ত চিকিৎসকে কিশোৰীক যৌন অতিশয্য চলোৱা বুলি অপবাদ দিছিল। যদি তেওঁৰ তেনে কিবা তথ্য আছে তেন্তে সেই তথ্য ৰাইজৰ সন্মুখত বা আদালতত প্ৰকাশ কৰক। তেনে চিকিৎসকক মই ১০০ শতাংশ শাস্তি দিয়াত সহায় কৰিম।‘

অন্যথা এগৰাকী চিকিৎসকৰ ভাৱমূৰ্তি নষ্ট কৰাৰ বাবে আঙুৰতা ডেকাক ৰাজহুৱাভাৱে ক্ষমা খোজাৰ দাবী তোলে মমিনে।

অৱশ্যে, কিছুসময় পাছতে তেওঁ টুইটাৰৰ পৰা পোষ্টটো আঁতৰাই পেলায়। এই সন্দৰ্ভত আমাৰ সাংবাদিকে ডা০ নোমল মমিনৰ সৈতে কথা পাতিবলৈ বিচৰাত তেওঁ ব্যস্ত থকা বুলি উল্লেখ কৰে।

ইপিনে, সংবাদ মাধ্যমত বাতৰি প্ৰকাশ পোৱাৰ পাছতে এই সন্দৰ্ভত মুখ খুলিছে প্ৰাক্তন বিধায়িকা আঙুৰলতা ডেকাই। চিকিৎসক সমাজক ক্ষমা খোজা বাদেই তেওঁ ওলোটাই সংবাদ মাধ্যমেহে বিকৃত ৰূপত বাতৰি পৰিবেশন কৰা বুলি উল্লেখ কৰে।

তেওঁ পোষ্টটোত কয় ‘আমাৰ মহিলাসকলৰ মাজৰ কিছুসংখ্যকে বিভিন্ন সময়ত বিভিন্ন ক্ষেত্ৰত শাৰীৰিক আৰু মানসিক নিৰ্যাতনৰ সন্মুখীন হৈ আহিছে আৰু তাৰ মাজৰে কিছুসংখ্যকে পৰিস্থিতিৰ পাকচক্ৰত পৰি এই নিৰ্যাতনৰ বিৰুদ্ধে মুকলিকৈ প্ৰতিবাদ কৰিবলৈ সক্ষম নহয়৷ সেই প্ৰসংগতে মই মাত্ৰ অতীতত ঘটি যোৱা এটা ঘটনাৰ উদাহৰণ দাঙি ধৰিছিলোঁ৷ কিন্তু সেই উদাহৰণৰ দ্বাৰা গুৰুত্বপূৰ্ণ বিষয় এটা দাঙি ধৰিব খোজা মোৰ সৎ উদ্দেশ্যক আওকাণ কৰি একাংশ সংবাদ মাধ্যমে বিকৃত ৰূপত গোটেই বিষয়টোক এটা বিতৰ্কৰ দিশে লৈ যোৱাৰ বাবে প্ৰয়াস কৰা পৰিলক্ষিত হৈছে। চিকিৎসক সকলৰ মাজৰ দুই এগৰাকীয়েও প্ৰকৃত সত্য নজনাকৈ নিজৰ মতামত সমূহ বিভিন্ন মাধ্যমত দাঙি ধৰা দেখা পাইছোঁ৷’

‘ গতিকে মই সদাশয় সকলো লোককে জনাব বিচাৰিছোঁ যে, কোনো এটা বৃত্তিৰ লগত জড়িত সমাজ এখনক আজুৰি কথা কোৱা বা হেয় প্ৰতিপন্ন কৰাৰ ধৃষ্টতাও মোৰ নাই আৰু সেয়া মোৰ উদ্দেশ্যও নাছিল। অতীতত ঘটা কোনো ঘটনাৰ উদাহৰণ এটাক সাধাৰণীকৰণ কৰি ‘বিতৰ্ক’ কৰিব খোজা চক্ৰান্তত ভৰি দিয়াৰ আগতে সকলোৱে প্ৰকৃত সত্য জনাতো প্ৰয়োজনীয়। সেয়েহে ভৱিষ্যতেও কোনো এটা প্ৰসংগত কেৱল প্ৰক্ষিপ্ত/উদ্দেশ্য প্ৰণোদিত ভাবে সম্পাদিত ভিডিঅ’ চাই মতামত ব্যক্ত কৰাৰ আগতে প্ৰকৃত সত্যটো জানি লোৱাৰ বাবে সম্পূৰ্ণ ভিডিঅ’ চোৱাৰ বাবে আহ্বান জনালোঁ৷ আশা কৰিছোঁ মোৰ এইখিনি বক্তব্যই বিভ্ৰান্তি আৰু ‘বিতৰ্ক’ দূৰ কৰিব।‘ তেওঁ এইদৰে কয়।