বোধোদয়! গান্ধী পৰিয়ালৰ বাহিৰৰ ব্যক্তিক কংগ্ৰেছৰ সভাপতি পতাৰ আহ্বান প্ৰিয়ংকাৰ
পৰিয়াল তান্ত্ৰিক ব্যৱস্থাৰে পৰিচালিত কংগ্ৰেছত এতিয়া সভাপতি হ’ব পৰাকৈ গান্ধী পৰিয়ালত কোনো নেতা নাই।
সেইবাবেই ম্যাদ উকলি যোৱাৰ পিছতো ছোনিয়া গান্ধীকেই পুনৰ দলটোৰ অন্তৰ্ৱতীকালীন সভাপতি পাতিবলগীয়া হৈছে। এনে পৰিস্থিতিত দলটো একপ্ৰকাৰ মুৰব্বী বিহীন হৈ পৰিছে।
২০১৯ চনত ৰাহুল গান্ধীয়ে কংগ্ৰেছৰ সভাপতি পদ এৰাৰ পিছতে ছোনিয়া গান্ধীক দলটোৰ অন্তৰ্ৱতী সভাপতি পতা হৈছিল।
কংগ্ৰেছৰ সংবিধান অনুসৰি দলৰ অন্তৰ্ৱতীকালীন সভাপতিৰ কাৰ্যকাল এবছৰ যদিও এবছৰ উকলি যোৱাৰ পিছতো নেতাৰ অভাৱত ছোনিয়াকেই সেই পদত বাহাল ৰখা হৈছিল।
নাও বুৰিলেও টিঙৰ পৰা নামিব নিবিচৰা গান্ধী পৰিয়ালে এতিয়া যেন প্ৰকৃত বাস্তৱ বুজি উঠিছে।
সেই বাবেই ছোনিয়া গান্ধীৰ কন্যা প্ৰিয়ংকা গান্ধীয়ে কংগ্ৰেছৰ সভাপতি পদত গান্ধী পৰিয়ালৰ বাহিৰৰ কোনো লোকক কংগ্ৰেছৰ সভাপতি পদত উপবিষ্ট কৰোৱাৰ সপক্ষে মত দিছে।
এক সাক্ষাৎকাৰত প্ৰিয়ংকাই কৈছে যে গান্ধী পৰিয়ালৰ বাহিৰৰ কোনো ব্যক্তিক সভাপতিৰ পদত বহুৱালেও তেওঁ তেওঁক মানি ল’ব আৰু তেওঁৰ নিৰ্দেশ মতেই চলিব।
নতুন সভাপতিয়ে যদি প্ৰিয়ংকাক উত্তৰপ্ৰদেশৰ সলনি আন্দামান-নিকোবৰত নিৰ্বাচন খেলিবলৈ দিয়ে তেন্তে সেয়াও তেওঁ মানি ল’ব বুলি প্ৰকাশ কৰিছে।
লোকসভা নিৰ্বাচন সমাগত যদিও কংগ্ৰেছে এজন স্থায়ী সভাপতি এতিয়ালৈকে নিৰ্বাচন কৰিব নোৱাৰাত দলৰ ভিতৰতে বিৰুপ প্ৰতিক্ৰিয়াৰ সৃষ্টি হৈছে।