ৰে’ল দবাৰ ভিতৰত পোহৰ ব্যৱস্থা উন্নত কৰাৰ বাবে উত্তৰ-পূব সীমান্ত ৰে’লৱেৰ এল ই ডি বাল্ব সংযোগৰ পদক্ষেপ

উত্তৰ-পূব সীমান্ত ৰে’লৱে ইয়াৰ ৰে’লসমূহৰ দবাৰ ভিতৰত থকা সাধাৰণ বাল্ব আৰু চি এফ এল বাল্বসমূহ সলনি কৰি নতুন এল ই ডি বাল্বৰ সংযোগ দিয়াৰ বাবে কাৰ্য্যব্যাৱস্থা হাতত লৈছে।

উত্তৰ-পূব সীমান্ত ৰে’লৱেৰ এই পদক্ষেপে ৰে’ল দবা সমূহৰ আভ্যন্তৰৰ পোহৰৰ ব্যৱস্থা উন্নত কৰিব।

বৰ্তমানলৈ ১৮৯০ টা দবাত এল ই ডি লাইটৰ সংযোগ দিয়া হৈছে আৰু ২০১৯ চনৰ ছেপ্তেম্বৰ মাহৰ ভিতৰত উপলব্ধ সকলো দবাৰ ভিতৰত এল ই ডি লাইটৰ সংযোগ দিয়া সম্পূৰ্ণ হ’ব বুলি এন এফ আৰৰ মুখ্য জনসম্পৰ্কৰক্ষী বিষয়াই জাৰি কৰা জাননীৰ পৰা জানিব পৰা গৈছে।

জাননীখনত এই পদক্ষেপৰ দ্বাৰা ৰে’লত ব্যৱহাৰ কৰা শক্তি ৪০ শতাংশলৈ ৰাহি কৰিব পৰা যাব বুলি উল্লেখ কৰা হৈছে।

‘‘উত্তৰ-পূব সীমান্ত ৰে’লৱেৰ এল ই ডি লাইট স্থাপন পদক্ষেপৰ জৰিয়তে কেবল মাত্ৰ শক্তি ৰাহি কৰাই নহয় ইয়াৰ দ্বাৰা ৰে’ল দবাৰ ভিতৰৰ পোহৰ ব্যৱস্থাও উন্নত হ’ব’’-জাননীখনত এনেদৰে প্ৰকাশ কৰা হয়।

উত্তৰ-পূব সীমান্ত ৰে’লৱে ইতিমধ্যে ইয়াৰ অন্তৰ্গত ৰে’ল ষ্টেশ্যন সমূহত এল ই ডি লাইটেৰে সংযোগ কৰিছে।

গুৱাহাটী, ডিব্ৰুগড়, এন চি বি, এন জি পি, ৰঙিয়া আদিৰ দৰে গুৰুত্বপূৰ্ণ ষ্টেশ্যন তথা জংছন সমূহত বিমান বন্দৰৰ দৰে উন্নত প্ৰযুক্তিৰ বাল্বৰ সংযোগ দিয়া হৈছে বুলি বিভাগটোৱে প্ৰকাশ কৰা জাননী খনত উল্লেখ কৰা হৈছে।