অসমত নাই এজনো বিদেশী : মুছলিম ছাত্ৰ সন্থা

অসমত কোনোধৰণৰ বিদেশী নাই। বিদেশীৰ নামত প্ৰকৃত ভাৰতীয়ক হাৰাশাস্তি কৰি আছে। এন আৰ চি ৰ চূড়ান্ত তালিকা প্ৰকাশলৈ মাজত মাথোঁ এটা দিন থাকোতে দিছপুৰ প্ৰেছ ক্লাৱত সংবাদমেল সম্বোধন কৰি এই মন্তব্য মুছলিম ছাত্ৰ সন্থা, অসমৰ সাধাৰণ সম্পাদক আশ্বিক ৰাব্বাণীৰ।

ৰাব্বাণীৰ মতে ‘সংখ্যালঘু লোকৰ বিভিন্ন নথি পত্ৰ থকাৰ পিছতো ভাৰতীয় নাগৰিকক বিদেশী খেদাৰ নামত হাৰাশাস্তি কৰা হৈছে’।

ইপিনে অসমত যদি বিদেশী আছে তেন্তে দেখুৱাই দিবলৈ ৰাজ্য চৰকাৰক আহ্বান জনায় সাধাৰণ সম্পাদক গৰাকীয়ে।

আনহাতে, একেখন সংবাদমেলতে উপস্থিত থাকি সংগঠনটোৰ সভাপতি জালাল উদ্দীনে কয় “অসম চুক্তিৰ আধাৰত অসমত চলি থকা চূড়ান্ত এন আৰ চিত যদি অসমৰ এজন লোকৰ নামো বাদ পৰে তেনেহ’লে আমি সহ্য নকৰো। যদি অবৈধ বিদেশীৰ নাম সোমাই তেনেহলে কথা বেয়া হ’ব ।”

শুদ্ধ এন আৰ চি প্ৰকাশ নাপালে মুছলিম ছাত্ৰ সন্থাই গণতান্ত্ৰিক আন্দোলন কৰিব বুলিও হুংকাৰ প্ৰদান কৰে।

“ধৰ্মীয় ভাষিক লোকে এন আৰ চিৰ বাবে যথেষ্ট দুৰ্ভোগ ভুগিছে। এটা দিন থাকোতেও শুনানিৰ বাবে মাতিছে। প্ৰতীক হাজেলাই নিজা ববীয়াকৈ কিছুমান নিয়ম কানুন উলিয়াইছে। আমাৰ সহ্যৰ সীমা বাহিৰ হৈছে।” জালাল উদ্দিনে এইদৰে কয়।

তাৎপৰ্যপূৰ্ণভাৱে কেৱল ভাষিক সংখ্যালঘুৰ কাৰণেহে চলি আছে বুলি গুৰুতৰ অভিযোগ কৰি তেওঁ কয় “যি সকলক হিয়েৰিঙৰ বাবে মতা হৈছে সেই সকলৰ তথ্য এদিনৰ ভিতৰত প্ৰতীক হাজেলাৰ হাতত নপৰে’।

ইপিনে বিধায়ক শিলাদিত্যই মুছলমানৰ বিৰুদ্ধে কৰা মন্তব্যৰ গৰিহণা দি তেওঁ কয় “তেওঁ আচলতে প্ৰকৃত খিলঞ্জীয়া হয় নে নহয় সি ৰহস্য জনক। যদি কিবা নহ’ব লগীয়া হয় তেনেহলে তাৰ বাবে শিলাদিত্য দায়ী হ’ব। শিলাদিত্য বাংলাদেশী হয়। শিলাদিত্যই সাম্প্ৰদায়িক মন্তব্য কৰি অসম আৰু অসমীয়াৰ মাজত ভাতৃঘাটি সংঘৰ্ষ সৃষ্টি কৰিব বিচাৰিছে’।

‘শিলাদিত্য দেবক শীঘ্ৰে গ্ৰেপ্তাৰ কৰক নহ’লে তীব্ৰ আন্দোলন গঢ়ি তোলা হ’ব’। এনেদৰে সকীয়নী প্ৰদান কৰে জালাল উদ্দিনে।