নতুন কথা নহয়, অপপ্ৰচাৰ: বিহু সমিতি, শিল্পীৰ জি এছ টি সন্দৰ্ভত বিজেপি

বিজেপিয়ে শনিবাৰে স্পষ্ট কৰিছে যে অসমৰ বিহু সমিতি আৰু শিল্পীসকলে জি এছ টি দিব লাগিব বুলি প্ৰকাশিত বাতৰি এক “অপপ্ৰচাৰ” আৰু তেওঁলোক এই কৰৰ আওতাত পৰাটো নতুন কথা নহয়।

“অপপ্ৰচাৰেৰে সাংস্কৃতিক পৰিৱেশ বিনষ্ট কৰিব বিচৰা হৈছে। যাৰ উপাৰ্জন ২০ লাখতকৈ বেছি তেওঁলোকে যোৱা তিনিবছৰে (জি এছ টি) দি আহিছে। এইটো নতুন কথা নহয়,” বিজেপিৰ ৰাজ্যিক মুখপাত্ৰ পবিত্ৰ মাৰ্ঘেৰিটাই গুৱাহাটীত সংবাদমেলত কয়।

অসমৰ জি এছ টি আয়ুক্তই বিহু সমিতিসমূহলৈ এই সন্দৰ্ভত ইতিমধ্যে জাননী জাৰি কৰা বুলি প্ৰকাশিত বাতৰিও অগ্ৰাহ্য কৰিছে মুখপাত্ৰগৰাকীয়ে। “কোনো জাননী বিহু উদযাপন কমিটিলৈ যোৱা নাই।”

টিকেটৰ ব্যৱস্থা নথকালৈকে আৰু এক নিৰ্ধাৰিত মূল্যলৈকে বিহু সমিতিয়ে জি এছ টি দিয়াৰ কথা নাহে, দলটোৰ আন এগৰাকী মুখপাত্ৰ জয়ন্ত মল্ল বৰুৱাই কয়।

“টিকট কটা কথা নহালৈকে কোনো GST দিব নালাগে। টিকটৰ মূল্য ৫০০ টকাৰ তলত হ’লে GST দিব নালাগে,” বৰুৱাই কয়।

আনহাতে, পেছাগত শিল্পীসকলে নিজৰ আয়ৰ ভিত্তিত জি এছ টি দিয়াৰ নিয়ম আগৰপৰাই থকা বুলি তেওঁ মন্তব্য কৰে।

“২০ লাখ টকালৈকে বছৰি আয় কৰাসকলে GST দিব নালাগে। ২০ৰ পৰা ৫০ লাখলৈকে ৬% আৰু ৫০ লাখৰ পৰা ওপৰত ১৮% দিব লাগিব বুলি পূৰ্বৰে পৰা GST আইনত উল্লেখ আছে,” তেওঁ কয়।

জি এছ টিক নাগৰিকত্ব (সংশোধন) আইন ২০১৯ বিৰোধিতাৰ সৈতে সাঙুৰি প্ৰকাশ কৰা বাতৰিৰ বাবে, বিজেপি নেতাজনৰমতে, কিছুমান সংবাদ মাধ্যমে ক্ষমা খুজিব লাগে।

“আন্দোলনৰ লগত ইয়াক কিয় সংযোগ কৰা হ’ল? তেওঁলোকে সাংবাদিকৰ দায়বদ্ধতা স্বীকাৰ কৰি ক্ষমা খুজিব লাগে,” তেওঁ কয়।

অসমৰ শিল্পী সমাজৰ কা-বিৰোধিতাক “নিয়ন্ত্ৰণ”ৰ কৌশলৰূপে চৰকাৰে এই “নতুন ব্যৱস্থা” লোৱাৰ অভিযোগ উঠা বুলি কিছুমান বাতৰি প্ৰকাশ পাইছিল।