মোদী-হাছিনাৰ বৈঠক : এন আৰ চি প্ৰসংগ তুলিলে হাছিনাইহে; “প্ৰক্ৰিয়াটো চলিহে আছে” বুলি ভাৰতৰ উত্তৰ

অসমৰ জনগণক নিৰাশ কৰি আজি মোদী আৰু ভাৰত ভ্ৰমণৰত বাংলাদেশৰ প্ৰধান মন্ত্ৰী শ্বেইখ হাছিনাৰ মাজত অনুষ্ঠিত বৈঠকত দেশত থকা অবৈধ বাংলাদেশীসকলক প্ৰত্যৰ্পণ সম্পৰ্কীয় কোনো কথা আলোচনা নহ’ল।

এন আৰ চিৰ পিছৰ প্ৰক্ৰিয়াটোৰ দ্বাৰা চিনাক্ত হ’ব পৰা সম্ভাব্য অবৈধ বাংলাদেশীসকলক ঘূৰাই পঠোৱা সন্দৰ্ভটোৱে এই বৈঠকত ঠাই পাব বুলি অসমৰ দল-সংগঠনে আশা কৰি আছিল আৰু মোদীয়ে তাৰ বাবে প্ৰতিবেশী ৰাষ্ট্ৰখনক হেঁচা দিয়াটো এটা স্বাভাৱিক প্ৰত্যাশা হৈ পৰিছিল।

কিন্তু আজি হাছিনাইহে ওলোটাই এন আৰ চি বিষয়টো নিজৰ শংকাৰ সৈতে উত্থাপন কৰে।

ভাৰতে বিষয়টোত এটা পলায়নৰ পথ লৈ “প্ৰক্ৰিয়াটো চলিহে আছে” বুলি চুবুৰীয়া দেশখনৰ নেতৃত্বৰ শংকাক এৰি চলে।

“বাংলাদেশে ৰাষ্ট্ৰীয় নাগৰিকপঞ্জী বিষয়টো উত্থাপন কৰিছিল; এই প্ৰক্ৰিয়াটো চলিহে আছে বুলি কোৱা হয়। পৰিস্থিতিটো কি হয় আমি চাব লাগিব”, এ এন আইৰ বাতৰিত চৰকাৰী সূত্ৰৰ উদ্ধৃতি।

যোৱা ১ ছেপ্টেম্বৰত এটা বিবৃতিত বৈদেশিক পৰিক্ৰমা মন্ত্ৰ্যালয়ৰ মুখপাত্ৰ ৰৱীশ কুমাৰে স্পষ্ট কৰি দিছিল যে এন আৰ চিৰ পৰা বাদ পৰাসকলৰ অধিকাৰবোৰ সীমিত নহয় বা তেওঁলোকক আটক কৰা নহয়। আইনৰ অধীনত তেওঁলোকৰ অধিকাৰ সাব্যস্ত কৰাৰ সকলো সুযোগ অন্ত নোহোৱাৰ আগলৈকে পূৰ্বৰ দৰেই সকলো অধিকাৰ উপভোগ কৰিব পাৰিব।

কেন্দ্ৰীয় চৰকাৰখনে যে এন আৰ চি প্ৰকাশৰ পিছৰ প্ৰক্ৰিয়াৰ দ্বাৰা চিনাক্ত কৰা অবৈধ বাংলাদেশীক লৈ বাস্তৱ পৰিকল্পনা হাতত লোৱা নাই আজিৰ বৈঠক আৰু মন্তব্যৰ পৰা সেয়া স্পষ্ট হয়।

এন আৰ চি প্ৰক্ৰিয়াটোৰ পৰা ৰাজ্যখন সম্পূৰ্ণ উপকৃত হ’বলৈ চুবুৰীয়া দেশখনৰ অবৈধ নাগৰিকসকলক ঘূৰাই ল’বলৈ দেশখনৰ নেতৃত্বক সৈমান কৰোৱাটো দৰকাৰী। সেইফালৰ পৰা হাছিনাৰ এই ভ্ৰমণ অসমৰ বাবে গুৰুত্বপূৰ্ণ বিবেচিত আছিল।

প্ৰধান মন্ত্ৰী মোদীয়ে ২০১৪ চনৰ লোকসভা নিৰ্বাচনৰ প্ৰাকমুহূৰ্তত দিয়া ভাষণত “সকলো বাংলাদেশীয়ে টালি-টোপোলা বান্ধিব লাগিব” বুলি কৰা মন্তব্য কৰিছিল।

অবৈধ বাংলাদেশী বিতাড়নত অগপ, কংগ্ৰেছৰ চৰকাৰবোৰ বিফল হোৱাৰ পিছত মোদীৰ সেই বক্তব্যই স্বাভাৱিকতে উৎসাহিত কৰিছিল যদিও যোৱা ৬টা বছৰত প্ৰধান মন্ত্ৰী মোদীয়ে বাংলাদেশৰ সৈতে কোনো আলোচনাত সেয়া উত্থাপন নকৰিলে। বৰং এন আৰ চিক লৈ দুশ্চিন্তাৰ কাৰণ নাই বুলিহে বাংলাদেশ পক্ষক ভাৰতৰ পৰা জনোৱা হৈ আহিছে।

অবৈধ বাংলাদেশীক প্ৰত্যৰ্পণৰ কোনো কথা আলোচনা নোহোৱা সত্ত্বেও দুয়োখন দেশৰ দ্বিপাক্ষিক সম্পৰ্কৰ সকলো বিষয় আলোচনা কৰা বুলি মোদীয়ে আজি টুইট কৰে।

আজি দুয়োখন দেশৰ মাজত ৭খন চুক্তি হয়। পৰিবহণ, যোগাযোগ, সক্ষমতা বিকাশ আৰু সংস্কৃতিৰ বিষয়ক এইবোৰে সামৰি লৈছে। বাংলাদেশৰ পৰা এল পি জি গেছৰ আমদানি কৰা তিনিটা প্ৰকল্পও বৈঠকৰ মাজত উদ্বোধন কৰা হয়।