তুংগত বাকযুদ্ধ! মন্ত্ৰী প্ৰমীলা ৰাণীক ‘পুতনা’ আখ্যা সাংসদ নৱ শৰণীয়াৰ

বি টি চি পৰিষদীয় নিৰ্বাচনৰ দিন চমু চপাৰ লগে লগে মন্ত্ৰী প্ৰমীলাৰাণী ব্ৰহ্ম আৰু কোকৰাঝাৰৰ সাংসদ নৱ শৰণীয়াৰ মাজৰ তীব্ৰতৰ হৈ উঠিছে বাকযুদ্ধ।

ৰাজ্যৰ সমাজকল্যাণ বিভাগৰ মন্ত্ৰীগৰাকীয়ে সাংসদজনক আওপকীয়াকৈ “মহিষাসুৰ”ৰ সৈতে তুলনা কৰাৰ পিছত আজি মন্ত্ৰীগৰাকীক পুতনা আখ্যা দিয়ে সাংসদ শৰণীয়াই।

বাক্সা জিলাৰ মেৰকুছিৰ এটা পূজা মণ্ডপত উপস্থিত থকাৰ সময়তে মন্ত্ৰীগৰাকীক এই আখ্যা দিয়ে সাংসদগৰাকীয়ে।

“প্ৰমীলাৰাণীৰ সন্দৰ্ভত কোকৰাঝাৰ সমষ্টিৰ জনসাধাৰণে যি বেয়া মন্তব্য কৰে সেইবোৰ মোৰ মুখেৰে নোলায়। তেওঁ দুৰ্গাতো হ’বই নোৱাৰে, তেওঁ নাচি থকা পুতনাহে”, সংবাদ মাধ্যমৰ আগত শৰণীয়াৰ মন্তব্য।

সাংসদজনে লগতে কয় যে প্ৰমীলা ৰাণী ব্ৰহ্মই চেষ্টা কৰিলেও এইবাৰ হাগ্ৰামা মহিলাৰীক বিটিচিৰ শাসনৰ পৰা গাদীচ্যুত হোৱাৰ পৰা ৰক্ষা কৰিব নোৱাৰে।

“প্ৰমীলাৰাণী ব্ৰহ্মৰ কথাত গুৰুত্ব দি লাভ নাই। তেওঁ যিমান চেষ্টা কৰিলেও হাগ্ৰামক বচাব নোৱাৰে। হাগ্ৰামা বি টি চিৰ গাদীৰ পৰা গাদীচ্যুত হোৱাটো খাটাং। সেয়েহে তেওঁলোকে পাগলৰ দৰে আবোল-তাবোল বকিব পাৰে, আমি কেৰেপ নকৰো”, সংবাদ মাধ্যমৰ আগত সাংসদ নৱ শৰণীয়াৰ মন্তব্য।

তেওঁৰ দাবী. প্ৰমীলাৰাণী ব্ৰহ্ম আৰু তেওঁৰ সহযোগীসকলে ভয়তে থৰকাছুটি হেৰুৱাইছে।

“বড়ো-অবড়োৰ যি ৰাজনৈতিক সংঘাত তাৰ শান্তিপূৰ্ণ সমাধানত আমি বিশ্বাসী। নৱ শৰণীয়া টীমৰ বি টি চিত সংঘাত সৃষ্টি কৰাৰ কোনো ইচ্ছা নাই”, শৰণীয়াই কয়।