NSCN-IM on peace talk কিয় নতুন প্ৰধান মধ্যস্থতাকাৰীকলৈয়ো সন্তুষ্ট নহয় নগা বিদ্ৰোহী?
NSCN-IM on peace talk কেন্দ্ৰীয় চৰকাৰে শেহতীয়াকৈ এনএছচিএন-আইএমৰ সৈতে শান্তি আলোচনাৰ বাবে পূৰ্বৰ আৰ এন ৰবিৰ স্থানত প্ৰধান মধ্যস্থতাকাৰী হিচাপে নিযুক্তি দিছিল আই বিৰ বিশেষ সঞ্চালক এ কে মিশ্ৰক।
কিন্তু নগা বিদ্ৰোহী গোটটোৰ সৈতে কেন্দ্ৰই আলোচনা পুনৰ আৰম্ভ কৰাৰ প্ৰায় এমাহৰ ভিতৰতে এনএছচিএন-আইএমৰ পৰা আহিছে শক্তিশালী বিবৃতি।
এনএছচিএন-আইএমে কৈছে যে কেন্দ্ৰৰ নতুন প্ৰধান মধ্যস্থতাকাৰীগৰাকীয়ে ‘সকলো প্ৰচাৰিত বিষয়সমূহ ধৰি ৰখাত ব্যৰ্থ হৈছে’।
শনিবাৰে এনএছচিএন-আইএমৰ বিবৃতিত কোৱা হৈছে যে মিশ্ৰৰ নিযুক্তি আৰু প্ৰায় দুবছৰৰ বিৰতিত পুনৰ আৰম্ভ হোৱা আলোচনাৰ জৰিয়তে ‘ নগা সমস্যাৰ সমাধান প্ৰায় চূড়ান্ত হোৱাৰ দিশে বুলি অত্যধিক প্ৰচাৰ চলোৱা হৈছে’।
বিদ্ৰোহী সংগঠনটোৱে স্পষ্ট কৰি দিয়ে যে ভাৰত চৰকাৰে নিৰৱিচ্ছিন্নভাৱে নগা সমস্যা সমাধানৰ দিশত মূল সমস্যাসমূহত ৰাজনৈতিক পলায়নবাদৰ আশ্ৰয় লোৱাত সকলোধৰণৰ প্ৰচাৰ ফুটুকাৰ ফেন হৈ ধৰা দিছে।
Also Read: হিন্দু যুৱতীক বিয়া কৰাবলৈ ধৰ্মীয় পৰিচয় গোপনে ৰখা এজন ৩৫ বছৰীয়া লম্পটক গ্ৰেপ্তাৰ আৰক্ষীৰ
এনএছচিএন-আইএমৰ দাবীৰ প্ৰতি কেন্দ্ৰৰ স্থিতি দুৰ্ভাগ্যজনক বুলি অভিহিত কৰি বিদ্ৰোহী গোটটোৱে অভিযোগ কৰে যে ভাৰত চৰকাৰে এতিয়াও আলোচনাৰ গুৰুত্বপূৰ্ণ পৰ্যায়ত দৃষ্টি নিক্ষেপ কৰা নগা পতাকা আৰু সংবিধানৰ বিষয়টোৰ সন্তুলনৰ ক্ষেত্ৰত টুপাই বুৰ মাৰিছে।
নাগালেণ্ডৰ বাবে পৃথক পতাকা আৰু সংবিধান এনএছচিএন-আইএমৰ দুটা প্ৰধান দাবী কেন্দ্ৰই প্ৰত্যাখ্যান কৰিছে।
নগা বিদ্ৰোহী গোটটোৰ যুক্তি যে নগাসকলৰ বাবে পতাকাখন ‘মাত্ৰ কাপোৰ এটুকুৰা নহয়’, কিন্তু ‘নগা জাতিৰ গৌৰৱ আৰু মূল্যবোধৰ’ এক প্ৰতীক।
এনএছচিএন-আইএমে কয় যে তেওঁলোকে পতাকাখনক এখন ‘ সাংস্কৃতিক প্ৰতীক’ হিচাপে গ্ৰহণ কৰাৰ কেন্দ্ৰৰ প্ৰস্তাৱৰ দ্বাৰা ‘প্ৰভাৱিত’ নহয়।
‘’নগা সমস্যা এক সাংস্কৃতিক সমস্যা নহয় যে ভাৰত চৰকাৰে নগা পতাকাৰ দ্বাৰা সূচিত কৰা নগা ৰাজনৈতিক পৰিচয় বাদ দি নগা পতাকাক এক সাংস্কৃতিক পতাকা হিচাপে সলনি কৰা উচিত,’’-বিদ্ৰোহী গোটটোৱে বিবৃতিত এইদৰে কয়।
বিবৃতিটোত বিদ্ৰোহী গোটটোৱে স্পষ্ট কৰি দিয়ে ‘’ এনএছচিএনে নগা জনসাধাৰণক ভাৰত চৰকাৰে ৰচনা কৰা জালত পেলাই আন এক মহাভুলৰ বলি হ’বলৈ নিদিয়ে।‘’