এনএছচিএন-কেৰ অধ্যক্ষ লেফটেনেণ্ট জেনেৰেল খাংগো কনিয়াকৰ বিৰুদ্ধে মহাভিযোগ

নেশ্যনেল ছচিয়েলিষ্ট কাউঞ্চিল অব নাগালেণ্ড-খাপলাঙে (NSCN-K) আজি সংগঠনটোৰ প্ৰতিষ্ঠাপক অধ্যক্ষ এছএছ খাপলাঙৰ ভতিজা উং আঙক দলটোৰ অধ্যক্ষ হিচাপে নিৰ্বাচিত কৰিছে। একে সময়তে সংগঠনৰ নিয়ম ভংগ কৰাৰ অপৰাধত লেফটেনেণ্ট জেনেৰেল  খাংগো কনিয়াকৰ বিৰুদ্ধে মহাভিযোগ উত্থাপন কৰিছে।

সংগঠনটোৰ পৰা প্ৰকাশিত এখন সংবাদ বিজ্ঞপ্তিত দলটোৱে এই কথা জনাইছে।

স্মৰ্তব্য যে বিগত বছৰত এনএছচিএন-কেৰ নেতা খাপলাঙৰ মৃত্যু হোৱাৰ পাছত দলটোৰ প্ৰবীণতম নেতা খাংগো কনিয়াকৰ হাতত দলটোৰ নেতৃত্বৰ ভাৰ অৰ্পণ কৰা হৈছিল।

বিজ্ঞপ্তিটোত আৰু কোৱা হৈছে যে সংবিধান বহিৰ্ভুতভাৱে খাংগো কনিয়াকে সমূহীয়াভাৱে সিদ্ধান্ত গ্ৰহণ কৰাৰ পৰিৱৰ্তে স্বেচ্ছাচাৰীভাৱে ক্ষমতাৰ ব্যৱহাৰ কৰিছিল।

বিজ্ঞপ্তিটোত পুনৰ কোৱা হৈছে যে দলটোৰক ভাঙি যোৱাৰ পৰা ৰক্ষা কৰাৰ বাবে খাংগোৰ বিৰুদ্ধে মহাভিযোগ অনাটো অতি জৰুৰী হৈ পৰিছিল।

এনএছচিএনৰ জৰুৰীকালীন সময়ৰ অধ্যক্ষ কিলোংছেৰ চোৱাংছিঙে ( Kilonser Chowangsing) স্বাক্ষৰ কৰা বিজ্ঞপ্তিটোত কোৱা হৈছে যে খাংগোৰ পৰা সকলো ক্ষমতা, বিশেষাধিকাৰ আৰু কাৰ্যকাৰী ক্ষমতাসমূহ কাঢ়ি লোৱা হৈছে।

সংবাদ বিজ্ঞপ্তিটোত আৰু কোৱা হৈছে যে উং আঙে এনএছচিএন-কেৰ সিদ্ধান্ত অনুসাৰে দায়িত্বভাৰ গ্ৰহণ কৰিব।

উল্লেখ্য যে নৱ নিযুক্ত অধ্যক্ষ উং আঙক এনএছচিএন-কেৰ ম্যানমাৰত বাহৰ পাতি থকা সদস্যসকলে সংখ্যাগৰিষ্ঠ ভোটত বিজয়ী কৰি অধ্যক্ষ হিচাপে নিৰ্বাচিত কৰিছে।

টাংছাং জনগোষ্ঠীৰ অন্তৰ্গত উং আং হৈছে মণিপুৰ বিশ্ববিদ্যালয়ৰ ৰাজনীতি বিজ্ঞানৰ স্নাতকোত্তৰ।  তেওঁ এগৰাকী সমৰকলা আৰু পোলো খেলৰ সুদক্ষ খেলুৱৈ।