অমিক্ৰনৰ দ্ৰুত সংক্ৰমণ: এইবাৰ ওড়িশাতো নিষিদ্ধ বৰদিন,নৱবৰ্ষৰ অনুষ্ঠান

অমিক্ৰনৰ দ্ৰুত সংক্ৰমণৰ পৰিপ্ৰেক্ষিতত দিল্লী আৰু কৰ্ণাটকত বৰদিন আৰু নৱবৰ্ষৰ অনুষ্ঠান চৰকাৰে নিষিদ্ধ কৰাৰ পিছত ওড়িশাৰ চৰকাৰেও এই ক্ষেত্ৰত কঠোৰ ব্যৱস্থা গ্ৰহণ কৰিছে।

ওড়িশাৰ মুখ্য সচিব এছ চি মহান্তিয়ে জাৰি কৰা নিৰ্দেশনাত কোৱা হৈছে যে বৰদিনৰ প্ৰাৰ্থনাত কেৱল মাত্ৰ ৫০ জন লোকহে উপস্থিত থাকিব পাৰিব। কোনো নৃত্য-গীত, ভোজৰ আয়োজন কৰিব পৰা নাযাব।

উল্লেখ্য ওড়িশাত ৪ জন লোক অমিক্ৰনত আক্ৰান্ত হৈছে।

দেশত ৩৫৮ গৰাকী লোক অমিক্ৰনত আক্ৰান্ত হোৱাৰ পিছত কেইবা খনো ৰাজ্যই বৰদিন আৰু নৱবৰ্ষৰ অনুষ্ঠান নিষিদ্ধ কৰিবলৈ বাধ্য হৈছে।

দিল্লীয়ে বৰদিন আৰু নৱবৰ্ষৰ অনুষ্ঠান বাতিল কৰাৰ পিছত কৰ্ণাটকৰ চৰকাৰেও নৱবৰ্ষৰ অনুষ্ঠান নিষিদ্ধ কৰাৰ কথা ঘোষণা কৰিছে।

অ’মিক্ৰনৰ সংক্ৰমণ বৃদ্ধি পোৱাৰ বাবেই আজি হাৰিয়ানা চৰকাৰে নৈশ সান্ধ্য জাৰি কৰিছে। ইতিমধ্যে মধ্য প্ৰদেশ আৰু উত্তৰ প্ৰদেশেও নৈশ সান্ধ্য আইন জাৰি কৰি অমিক্ৰনৰ সংক্ৰমণ ৰোধৰ চেষ্টা চলাইছে।

সমগ্ৰ হাৰিয়ানাত আজি নিশা ১১ বজাৰ পৰা পুৱা ৫ বজালৈ নৈশ সান্ধ্য আইন জাৰি কৰা হৈছে। উত্তৰ প্ৰদেশ আৰু মধ্য প্ৰদেশতো নৈশ সান্ধ্য আইন জাৰি কৰা হৈছে।