নাৰ্কটিক কণ্ট্ৰল ব্যুৰোৰ বিৰুদ্ধে সৰৱ সুশান্ত সিং ৰাজপুত পৰিয়ালৰ ব্যক্তিগত অধিবক্তা

নাৰ্কটিক কণ্ট্ৰল ব্যুৰো, চমুকৈ এনচিবিৰ ওপৰত এইবাৰ চাঞ্চল্যকৰ ভাষ্য প্ৰদান কৰিছে সুশান্ত সিং ৰাজপুতৰ পৰিয়ালৰ অধিবক্তা বিকাশ সিঙে।

অধিবক্তাগৰাকীয়ে এটা ৰাষ্ট্ৰীয় সংবাদ মাধ্যমৰ আগত কয় যে এনচিবিয়ে প্ৰকৃততে মিডিয়াত চৰ্চিত হৈ থাকিব বিচাৰে। সেয়ে এনচিবিয়ে বলিউডক বদনাম কৰিবলৈ টাৰ্গেট কৰি লৈছে।

তদুপৰি তেওঁ কয় যে এনচিবিয়ে ড্ৰাগছৰ অনিয়মীয়া ব্যৱহাৰকাৰীসকলকহে লক্ষ্য কৰি লৈছে। কিন্তু দিল্লীৰ দৰে চহৰসমূহৰ অভিজাত পাৰ্টিসমূহত আনকি শিশুসকলেও ড্ৰাগছ সেৱন কৰে। ক্ষমতাশালী লোকসকলো তাত উপস্থিত থাকে। সেয়ে উক্ত অভিজাত পাৰ্টিসমূহো ৰেইড কৰিবলৈ তেওঁ এনচিবিক পৰামৰ্শ দিয়ে।

উল্লেখযোগ্য যে যোৱা বৰ্ষত অভিনেতা সুশান্ত সিং ৰাজপুতৰ ৰহস্যজনক মৃত্যুৰ পাছতে তেওঁৰ পৰিয়ালৰ হৈ জ্যেষ্ঠ অধিবক্তাজনে আদালতত যুঁজ দি আহিছে।

অভিনেতাজনৰ মৃত্যুৰ আঁৰত ড্ৰাগছ কাণ্ড জড়িত হৈ আছে বুলি অভিযোগ উঠিছিল। আনকি বিষয়টোত বিজেপিয়েও হাত উজান দিছিল।

শেহতীয়াকৈ শ্বাহৰুখ তনয় আৰিয়ানক এনচিবিয়ে গ্ৰেপ্তাৰ কৰাক লৈও দেশ উত্তাল হৈ আছে। তেনে পৰিস্থিতিত সুশান্তৰ অধিবক্তাজনে এনচিবিক লৈ কৰা এই ভাষ্যই চাঞ্চল্যৰ সৃষ্টি কৰিছে।