ধৰিত্ৰী দিৱসৰ দিনা গুৱাহাটীৰ কৃত্ৰিম বানপানী আৰু পৰিৱেশ সংৰক্ষণৰ আহ্বানত গৌৰৱ গগৈ
আজি সমগ্ৰ বিশ্বৰ লগতে অসমতো ধৰিত্ৰী দিৱস পালন কৰা হৈছে। এই বিশেষ দিনটোৰ সৈতে সংগতি ৰাখি অসমৰ কংগ্ৰেছ নেতা গৌৰৱ গগৈয়ে গুৱাহাটীৰ কৃত্ৰিম বানপানীৰ সমস্যাক লৈ গভীৰ উদ্বেগ প্ৰকাশ কৰাৰ লগতে এক বহনক্ষম জীৱনশৈলী গ্ৰহণ কৰিবলৈ সকলোকে আহ্বান জনাইছে।
তেওঁ সামাজিক মাধ্যমৰ জৰিয়তে পৰিৱেশ সুৰক্ষা আৰু প্ৰকৃতিৰ সংৰক্ষণৰ বাবে এক নতুন সংকল্প ল‘বলৈ ৰাইজক অনুৰোধ কৰে। গগৈয়ে তেওঁৰ বাৰ্তাত পৰিৱেশ অনুকূল অভ্যাস গ্ৰহণ কৰা আৰু আমাৰ পৃথিৱীখনক সুৰক্ষিত কৰাৰ বাবে সামূহিক দায়িত্ব লোৱাৰ ওপৰত গুৰুত্ব আৰোপ কৰিছে।
নেতাগৰাকীয়ে কয় যে আমি আমাৰ গ্ৰহটো ৰক্ষা কৰিবলৈ আৰু প্ৰাকৃতিক সম্পদসমূহ সংৰক্ষণ কৰিবলৈ প্ৰতিশ্ৰুতিবদ্ধ হোৱা উচিত যাতে আগন্তুক প্ৰজন্মই এটা সুস্থ আৰু সেউজ ভৱিষ্যত লাভ কৰিব পাৰে।
উল্লেখ্য যে বৰ্তমান গুৱাহাটী চহৰৰ বিভিন্ন স্থানত কৃত্ৰিম বানপানীয়ে এক ভয়াবহ ৰূপ ধাৰণ কৰিছে। অপৰিকল্পিত নগৰীকৰণ, নলা-নৰ্দমাৰ বিসংগতি আৰু অনিয়ন্ত্ৰিত নিৰ্মাণ কাৰ্যৰ বাবেই এই সমস্যাৰ সৃষ্টি হোৱা বুলি বিভিন্ন মহলে অভিযোগ কৰি আহিছে। এনে সময়তে গৌৰৱ গগৈৰ এই মন্তব্যই বিশেষ তাৎপৰ্য বহন কৰিছে।
গোলকীয় পৰিৱেশৰ প্ৰত্যাহ্বানসমূহৰ কথা উল্লেখ কৰি তেওঁ কয় যে জলবায়ু পৰিৱৰ্তন, বন ধ্বংস আৰু জৈৱ বৈচিত্ৰ্যৰ বিলুপ্তিৰ দৰে সমস্যাবোৰ যদিও বিশ্বজুৰি বিয়পি আছে, তথাপিও ইয়াৰ বিৰুদ্ধে স্থানীয়ভাৱে পদক্ষেপ লোৱাটো অত্যন্ত প্ৰয়োজনীয়। তেওঁ জাৱৰ-জোঁথৰ কমোৱা, পানী সংৰক্ষণ কৰা আৰু ব্যক্তিগত তথা সামাজিক স্তৰত বহনক্ষম পদ্ধতি অৱলম্বন কৰাৰ কথা দোহাৰে। তেওঁ বিশ্বাস কৰে যে সকলোৰে সন্মিলিত প্ৰচেষ্টাৰ জৰিয়তেহে সমাজত এক অৰ্থপূৰ্ণ পৰিৱৰ্তন অনাটো সম্ভৱ হ‘ব।
পৰিৱেশবিদসকলৰ মতে অসমৰ জৈৱ বৈচিত্ৰ্য অতি চহকী যদিও জলবায়ুৰ পৰিৱৰ্তন আৰু পৰিৱেশৰ অৱনতিৰ বাবে এই অঞ্চলটো এতিয়া যথেষ্ট সংকটত আছে। তেওঁলোকে দীৰ্ঘদিন ধৰি চৰকাৰী নীতি কঠোৰ কৰিবলৈ আৰু জনসাধাৰণক সজাগ হ‘বলৈ আহ্বান জনাই আহিছে। আজিৰ এই ধৰিত্ৰী দিৱসত গৌৰৱ গগৈৰ এই আহ্বানে নাগৰিক আৰু নীতি নিৰ্ধাৰক উভয়কে ভৱিষ্যত প্ৰজন্মৰ স্বাৰ্থত পৰিৱেশ সুৰক্ষাৰ বাবে দৃঢ় পদক্ষেপ ল‘বলৈ পুনৰবাৰ সোঁৱৰাই দিছে।