অৰুণাচলত এন এছ চি (আৰ)-ৰ সদস্যৰ গা শিয়ৰি উঠা নৃশংসতা; কোবাই কোবাই মাৰিলে যুৱকক; উত্তেজনা অব্যাহত
নাগা সশস্ত্ৰ বিদ্ৰোহী গোট এন এছ চি (আৰ)-ৰ সদস্যৰ নিৰ্মম প্ৰহাৰত অৰুণাচল প্ৰদেশৰ দক্ষিণ চাংলাঙত এজন যুৱকে মৃত্যুক সাৱটি লোৱাৰ কৰুণ ঘটনা এটা পোহৰলৈ আহিছে।
নিৰ্মম প্ৰহাৰত মৃত্যু হোৱা যুৱকজনৰ নাম হেংকন চলঠিং(৩৭)। হেংকন দক্ষিণ চাংলাং খিময়ুং প্ৰশাসনিক চক্ৰৰ জংজি হাবি গাঁৱৰ ৱিংখেং চলঠিঙৰ পুতেক।
২৬ আগষ্টত সংগঠনটোৰ সদস্যই এন এছ চি এন (কে)ৰ খাংগো কন্যাক গোটৰ হৈ ধন সংগ্ৰহ কৰাৰ অভিযোগত অতি নিষ্ঠুৰভাৱে লাঠীৰে কোবাই কোবাই হেংকনৰ সৰ্বাংগ শৰীৰ থেঁতেলিয়াই পেলায়।
এনে অমানুষিক অত্যাচাৰ সহিবলৈ অক্ষম হৈ অৱশেষত হেংকনে জীৱন ত্যাগ কৰে। গা শিয়ৰি উঠা ঘটনাটোৰ স্থল হ’ল জিলাখনৰ কনটাং চক্ৰৰ অন্তৰ্গত লংলুং গাঁও৷
হেংকনৰ মৃতদেহ চাংলাং চিকিৎসালয়লৈ অনা হৈছিল যদিও হেংকনৰ ক্ষুভিত পৰিয়ালে মৃতদেহৰ মৰণোত্তৰ পৰীক্ষা তথা অন্যান্য আইনী প্ৰক্ৰিয়া কৰিবলৈ নিদি মৃতদেহটো নিশাই ঘৰলৈ লৈ যায়৷
অসহনীয় ঘটনাটোৱে জিলাখনত তীব্ৰ চাঞ্চল্যৰ সৃষ্টি কৰিছে আৰু এতিয়াও উত্তেজনা অব্যাহত আছে। স্থানীয় আৰক্ষীয়ে সমগ্ৰ ঘটনাৰ তদন্ত আৰম্ভ কৰিছে বুলি জনাইছে।
উত্তৰ-পূবত আইন-শৃংখলা আৰু সন্ত্ৰাসবাদৰ কাৰ্য্যকলাপ কমিছে বুলি কেন্দ্ৰীয় আৰু ৰাজ্য চৰকাৰে দাবী কৰি থকাৰ সময়তে শেহতীয়াকৈ অঞ্চলটোত কেইবাটাও গণপ্ৰহাৰত মৃত্যুৰ ঘটনা ঘটিছে।