ক’ৰ’না ভাইৰাছক লৈ দুটা পক্ষৰ মাজত সংৰ্ঘষ; নিহত ১ জন, আহত ১০ জন
ক’ৰ’না ভাইৰাছে সমগ্ৰ বিশ্বতে মহামাৰী ৰূপ ধাৰণ কৰিছে।
সমগ্ৰ বিশ্বতে প্ৰায় ২.৫ লাখ লোক আক্ৰান্ত হোৱাৰ বিপৰীতে মৃত্যু হৈছে ১০ হাজাৰো অধিক আক্ৰান্তৰ।
বিশ্বৰ প্ৰতিখন দেশে নিজ দেশৰ জনসাধাৰণৰ মাজত ক’ৰ’না প্ৰতিৰোধৰ বাবে সজাগতা আৰু সতকৰ্তা অৱলম্বন কৰিবলৈ বিভিন্ন নীতি নিৰ্দেশনা জাৰি কৰিছে।
তেনে এক সময়তে ক’ৰ’না ভাইৰাছজনিত বাক-বিতণ্ডাৰ পিছত দুই পক্ষৰ মাজত খণ্ড যুদ্ধ লাগি আজি এজন লোকৰ মৃ্ত্যু ঘটিছে।
ঘটনাটো সংঘটিত হৈছে বাংলাদেশৰ ৰাজবাৰী নামৰ এখন ঠাইত। আজি পুৱা উপজিলাৰ ৰবাৰ্ট ইউনিয়নত ক’ৰ’না ভাইৰাছকলৈ দুটা দলৰ মাজত সৃষ্টি হোৱা তৰ্কা-তৰ্কিয়ে এটা মুহূৰ্তত খণ্ড যুদ্ধত পৰিণত হোৱাৰ ফলত লাবলু মোলা নামৰ এজন কৃষক নিহত হোৱাৰ বিপৰীতে ১০ জন লোক আহত হৈছে।
আৰক্ষীৰ সূত্ৰৰ মতে আজি পুৱা ক’ৰ’না ভাইৰাছৰ সম্পৰ্কত স্থানীয় চিকিৎসক ডাঃ খালেকৰ সৈতে নিহত লাবলু মোলাৰ কথাৰ কটাকটি হয়।
উক্ত কথা কটাকটিয়ে এসময় দুটা ফৈদৰ মাজত সংঘৰ্ষলৈ ৰূপান্তৰিত হয় আৰু সংঘৰ্ষত লাবলু মোলা নামৰ ব্যক্তিজন গুৰুতৰভাৱে আহত হয়। আহত লাবলু মোলাক স্থানীয় চিকিৎসালয়ত ভৰ্তি কৰা হয় যদিও তাতে তেওঁৰ মৃত্যু ঘটে।
ঘটনা সন্দৰ্ভত ইতিমধ্যে ডাঃ খালেকৰ সৈতে তেওঁৰ ফৈদৰ ৫ জন লোকক গ্ৰেপ্তাৰ কৰিছে আৰক্ষীয়ে।