চুলাই বেপাৰীৰ স্কুটীৰ খুন্দাত বোকাখাতত এজন লোকৰ মৃত্যু

বোকাখাতৰ লতাবাৰীত আজি সন্ধিয়া ৩৭ নং ৰাষ্ট্ৰীয় পথত হোৱা এক দুৰ্ঘটনাত এজন লোক নিহত হয়। নিহত লোকজনৰ নাম চন্দন ক’ল বুলি জানিব পৰা গৈছে।

জানিব পৰা মতে, প্ৰতিবেশীৰ ঘৰত বিয়া খাই লতাবাৰীত ৩৭ নং ৰাষ্ট্ৰীয় ঘাইপথ পাৰ হ’বলৈ লওতেই এ এছ ০৫ কে ৯৯৫৮ নম্বৰৰ তীব্ৰ বেগী স্কুটীখনে চন্দন ক’লক মহটিয়াই নিয়ে ৷

স্কুটীৰ খুন্দাত গুৰুতৰভাৱে আহত চন্দনক বোকাখাত চৰকাৰী চিকিৎসালয়লৈ অনা হয় যদিও চিকিৎসকে তেওঁক মৃত বুলি ঘোষণা কৰে। ঘটনাৰ পাছতেই স্থানীয় লোকে ১০৮ ক খবৰ দিয়ে যদিও ১০৮ পলমকৈ অহাৰ বাবে চন্দন ক’লৰ মৃত্যু হয় বুলি ৰাইজে অভিযোগ কৰে ৷

ইপিনে, স্কুটীৰে চুলাই মদৰ গেলন লৈ অহা লোকজনে ঘটনা সংঘৰ্টিত কৰিয়েই স্কুটী পেলাই ঘটনাস্থলীৰ পৰা পলায়ন কৰে বুলিও স্থানীয় লোকে জানিবলৈ দিয়ে ৷

আনহাতে, চুলাই মদৰ গেলনৰ সৈতে পৰিত্যক্ত স্কুটীখন আৰক্ষীয়ে জব্দ কৰাৰ লগতে তদন্ত আৰম্ভ কৰিছে। নিহত চন্দনৰ ঘৰ লতাবাৰী চাহ বাগিছাত বুলি জানিব পৰা গৈছে।