পুলৱামাত সন্ত্ৰাসবাদীৰ ভয়ংকৰ আক্ৰমণ, আৰপিএফৰ জোৱান নিহত

পাকিস্তানৰ নৱ নিযুক্ত প্ৰধানমন্ত্ৰী শ্বাহবাজ শ্বৰিফে কাশ্মীৰ প্ৰসংগকলৈ ভাৰতৰ প্ৰধানমন্ত্ৰী নৰেন্দ্ৰ মোদীলৈ পত্ৰ লিখাৰ সময়তে পুলৱামাত সোমবাৰে বিয়লি পুনৰ পাকিস্তানী সন্ত্ৰাসবাদীয়ে নিৰাপত্তা বাহিনীৰ ওপৰত ভয়ংকৰ আক্ৰমণ চলায়।

দক্ষিণ কাশ্মীৰৰ পুলৱামা জিলাৰ কাকাপোৰা অঞ্চলত সন্ত্ৰাসবাদীয়ে চলোৱা আক্ৰমণত ৰে’ল সুৰক্ষা বাহিনীৰ এজন জোৱান নিহত হয়।

এই ঘটনাত আন এজন জোৱান গুৰুতৰ ভাবে আহত হয়৷

সন্ত্ৰাসবাদীৰ আক্ৰমণত আহত জোৱান দুজনক চিকিৎসালয়লৈ নিয়া হয় যদিও এজন আৰপিএফ জোৱানৰ মৃত্যু ঘটে।

আক্ৰমণকাৰী সন্ত্ৰাসবাদীৰ সন্ধানত সেনা আৰু চিআৰপিএফে সমগ্ৰ অঞ্চলটো ঘেৰি লৈ অভিযান আৰম্ভ কৰিছে।

ইয়াৰ পূৰ্বে ২০১৯ চনৰ ১৪ ফেব্ৰুৱাৰীৰ দিনা কাশ্মীৰৰ পুলৱামাত পাক সন্ত্ৰাসবাদী সংগঠন জইচ-ই-মহম্মদে বিস্ফোৰণ ঘটাই ৪৪ জন চিআৰপিএফৰ জোৱানক হত্যা কৰিছিল।

পুলৱামাত পাক সন্ত্ৰাসবাদীয়ে ভয়ংকৰ আক্ৰমণ চলোৱাৰ পিছতে ভাৰতীয় বায়ুসেনাই পাক অধিকৃত কাশ্মীৰৰ বালাকোটত স্থাপন কৰা পাক সন্ত্ৰাসবাদীৰ শিবিৰত আক্ৰমণ চলাইছিল।

ভাৰতৰ এই ছাৰ্জিকেল ষ্ট্ৰাইকে শংকিত কৰি তুলিছিল পাকিস্তানৰ সেই সময়ৰ চৰকাৰক।