নগাঁৱৰ হেৰাপট্টিত দুৰ্বৃত্তৰ গুলীচালনাত গুৰুতৰভাৱে আহত এজন যুৱক

মঙলবাৰে নিশা নগাঁও জিলাৰ হেৰাপট্টিত এটা দুৰ্বৃত্তৰ দলে এজন লোকক উদ্দেশ্যি কৰা গুলীচালনাৰ ঘটনাই অঞ্চলটোত তীব্ৰ উত্তেজনাৰ সৃষ্টি কৰে। উক্ত গুলীচালনাৰ ফলত নুৰ হুছেইন নামৰ যুৱক এজন গুৰুতৰভাৱে আহত হয়।

গুৰুতৰভাৱে আঘাতপ্ৰাপ্ত হোৱা নুৰ হুছেইনক স্থানীয় লোকৰ সহযোগত সংকটজনক অৱস্থাত গুৱাহাটী চিকিৎসা মহাবিদ্যালয় হস্পিতালত ভৰ্তী কৰোৱা হয়।

ইফালে আহত নুৰ হুছেইনে গুলীচালনাৰ ঘটনাটো সম্পূৰ্ণ পৰিকল্পিত বুলি মন্তব্য কৰিছে। এখন চাৰিচকীয়া বাহনত পাঁচজনীয়া দুৰ্বৃত্তৰ দলে তেওঁৰ ওপৰত আক্ৰমণ চলোৱা বুলি আৰক্ষী তথা পৰিয়ালৰ লোকৰ আগত ভাষ্য প্ৰদান কৰে।

ইয়াৰ উপৰি ব্যক্তিগত শত্ৰুতাৰ বাবেই গুলীচালনাৰ দৰে জঘন্য কাণ্ড সংঘটিত কৰিছে বুলি গুৱাহাটীত চিকিৎসাধীন হৈ থকা নুৰ হুছেইনে জনায়।

উল্লেখ্য যে নুৰ হুছেইনে ইৰচাদ আলী, আকাশউদ্দিন, আমিৰ হুছেইন, ছিদ্দিক আলী আৰু মজিবুৰ ৰহমানৰ বিৰুদ্ধে গুলীচালনাৰ অভিযোগ উত্থাপন কৰিছে।

এতিয়াও এই সমগ্ৰ ঘটনাটো ৰহস্যৰ আৱৰ্তত আছে যদিও পৰৱৰ্তী সময়ত আৰক্ষীৰ অনুসন্ধানত সকলো স্পষ্ট হৈ পৰিব।