অমানবীয়: জে চি বিৰে সমাধিত পেলাই দিয়া হ’ল কৰ’না আক্ৰান্তৰ মৃতদেহ

বিশ্বজুৰি কৰ’নাৰ সংহাৰ অব্যাহত আছে। বৰ্তমান কৰ’না আক্ৰান্তৰ সংখ্যাৰ দিশেৰে বিশ্বৰ তৃতীয় স্থানত আছে ভাৰত।

বিভিন্ন ৰাজ্যত দ্ৰুত গতিত বৃদ্ধি পাইছে কৰ’না আক্ৰান্তৰ সংখ্যা। সেইদৰে, কৰ’নাত মৃত্যু হোৱা লোকৰ মৃতদেহকলৈয়ো সৃষ্টি হৈছে বহু অভূতপূৰ্ব ঘটনা।

অন্ধ্ৰ প্ৰদেশত এটা কৰ’না আক্ৰান্ত মৃতদেহৰ ক্ষেত্ৰত পোহৰলৈ অহা এক ঘটনাই সকলোৰে চকু কপালত তুলিছে।

ভাইৰেল হৈ পৰা প্ৰায় তিনি মিনিটৰ এটা ভিডিঅ’ত দেখা গৈছে যে মাটি কটা জে চি বি মেচিনেৰে কৰ’না আক্ৰান্তৰ মৃতদেহ গাঁতত পেলাই দিয়া হৈছে।

উক্ত ভিডিঅ’টো শ্বেয়াৰ কৰিছে অন্ধ্ৰ প্ৰদেশৰ প্ৰাক্তন মুখ্য মন্ত্ৰী চন্দ্ৰবাবু নাইডুৱে।

তেওঁ লগতে লিখিছে,’’এয়া অতি দুৰ্ভাগ্যজনক ঘটনা। নেল্লোৰত জে চি বি মেচিনেৰে কোনোমতে পেলাই দিয়া হৈছে এগৰাকী কৰ’না আক্ৰান্ত ব্যক্তিৰ মৃতদেহ। মুখ্য মন্ত্ৰী ৱাই এছ ৰেড্ডীয়ে ৰাজ্যবাসীৰ ওচৰত ক্ষমা বিচৰা উচিত।‘’

ৰাজ্যখনৰ নেল্লোৰ জিলাত সংঘটিত হৈছে এই অমানৱীয় ঘটনা। ইতিমধ্যে, নেল্লোৰৰ মহকুমা দণ্ডাধীশে এই লজ্জাজনক ঘটনাৰ তদন্তৰ নিৰ্দেশ দিছে।

উল্লেখ্য যে অন্ধ্ৰ চৰকাৰৰ বিৰুদ্ধে ইয়াৰ পূৰ্বেও এনে অভিযোগ উত্থাপিত হৈছে। যোৱা ২৬জুনত আৰু এগৰাকী কৰ’না আক্ৰান্তৰ মৃতদেহ জে চি বিৰে শ্মশানলৈ কঢ়িয়াই নিয়া হৈছিল।

Pained to see bodies of #Covid_19 patients in Nellore being disrespectfully thrown into a single pit using an Earthmover. This is happening time & again. @ysjagan Govt must offer an apology to the grieving families who wished for a respectful departure for their loved ones. pic.twitter.com/1y4TSG2brv

— N Chandrababu Naidu (@ncbn) July 10, 2020

অনুৰূপ ঘটনা সংঘটিত হৈছিল কৰ্ণাটকতো। ছচিয়েল মিডিয়াত ভাইৰেল হৈ পৰিছিল এটি ভিডিঅ’ য’ত ৰাজ্যখনৰ স্বাস্থ্য মন্ত্ৰীগৰাকীৰ গৃহ জিলা বল্লাৰীত গাঁতৰ ভিতৰত এটা এটাকৈ কৰ’না আক্ৰান্ত লোকৰ মৃতদেহ পেলাই দিয়া হৈছিল।

সেই ঘটনাত পিপিই কিট পৰিধান কৰা কেইজন ব্যক্তিয়ে ক’লা প্লাষ্টিকেৰে বন্ধা কেইবাটাও মৃতদেহ গাঁতৰ ভিতৰত পেলাই দিছিল। ডাম্পাৰত কঢ়িয়াই অনা আঠটাকৈ মৃতদেহ সেই গাঁতটোত সমাধিস্থ কৰা হৈছিল।

ৰাজ্য চৰকাৰে উক্ত কাৰ্যত জড়িত লোককেইজনৰ বিৰুদ্ধে ব্যৱস্থা গ্ৰহণ কৰে যদিও এই ঘটনাই মানৱতাক লজ্জিত কৰি তুলিছে।

অন্ধ্ৰ প্ৰদেশৰ এই শেহতীয়া ঘটনাতো দেশৰ সচেতন নাগৰিকসকলে মানৱতাৰ অপমৃত্যু লক্ষ্য কৰি চৰকাৰক ধিক্কাৰ দিছে।