Gujarat Election: প্ৰথম পৰ্যায়ৰ ভোটগ্ৰহণ সম্পূৰ্ণ; ভোটদানৰ হাৰ ৬০ শতাংশ অতিক্ৰম
গুজৰাট বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণত প্ৰায় ৬০ শতাংশতকৈও অধিক ভোটদান হৈছে। নিৰ্বাচন আয়োগৰ মতে, ভোটদান প্ৰক্ৰিয়া আনুষ্ঠানিকভাৱে সম্পূৰ্ণ নোহোৱালৈকে ৫৬.৮৮ শতাংশ ভোটদান নথিভুক্ত কৰা হৈছিল।
বৃহস্পতিবাৰে প্ৰথম পৰ্যায়ত কচ্ছ-সৌৰাষ্ট্ৰ আৰু দক্ষিণ গুজৰাটৰ ১৯ খন জিলাৰ ৮৯ খন আসনত ভোটগ্ৰহণ অনুষ্ঠিত হয়। প্ৰথম পৰ্যায়ত মুঠ ৭৮৮ জন প্ৰাৰ্থীৰ ভাগ্য নিৰ্ণয় হ’ব।
লগতে পঢ়ক: Gujarat Election 2022: মুচ নেহী তো কুচ নেহী! গোঁফেৰেই নিৰ্বাচনত ওলট-পালট কৰিব বিচাৰে হিচাপ-নিকাচ
গুজৰাটৰ মুখ্য নিৰ্বাচনী বিষয়াৰ কাৰ্যালয়ে জনায় যে পুৱা ৮ বজাত ১৪,৩৮২ টা বুথত ভোটগ্ৰহণ আৰম্ভ হৈছিল। ভোটগ্ৰহণ সন্ধিয়া ৫ বজালৈকে চলি থাকে। দ্বিতীয় পৰ্যায়ত, সোমবাৰে উত্তৰ আৰু মধ্য গুজৰাটৰ ৯৩ খন আসনত ভোটগ্ৰহণ অনুষ্ঠিত হ’ব। ফলাফলসমূহ অহা ৮ ডিচেম্বৰত প্ৰকাশ কৰা হ’ব।
এইবাৰ নিৰ্বাচনত ত্ৰিকোণীয় প্ৰতিদ্বন্দ্বিতা হ’ব। কংগ্ৰেছ আৰু বিজেপিৰ উপৰি এইবাৰ প্ৰতিদ্বন্দিতাত আছে অৰবিন্দ কেজৰিৱালৰ আপ।
উল্লেখ্য যে ২০১৭ চনৰ বিধানসভা নিৰ্বাচনত বিজেপিয়ে ৯৯ খন আসন লাভ কৰি একেৰাহে পঞ্চমবাৰৰ বাবে গুজৰাটত ক্ষমতালৈ আহিছিল। কিন্তু ১৯৯০ চনৰ পিছত এয়া আছিল বিজেপিৰ সৰ্বনিম্ন সংখ্যা। ২০১৭ চনৰ বিধানসভা নিৰ্বাচনত কংগ্ৰেছে ৭৭ খন আসন লাভ কৰিছিল। নিৰ্দলীয় আৰু বাকীসকলে লাভ কৰিছিল ৬ খন আসন।