শোকাৱহ: আৱাসিক অট্টালিকাৰ বিধ্বংসী অগ্নিকাণ্ডত ৭৩ গৰাকীৰ মৃত্যু
এক বিধ্বংসী অগ্নিকাণ্ডই মৃত্যুলীলা চলালে দক্ষিণ আফ্ৰিকাৰ জোহান্সবাৰ্গত। এক বহুমহলীয়া আৱাসিক ভৱনত সংঘটিত হোৱা এই ভয়ংকৰ অগ্নিকাণ্ডত প্ৰায় ৭৩ গৰাকী লোকৰ মৃত্যু নিশ্চিত কৰিছে প্ৰশাসনে।
স্থানীয় প্ৰশাসনে লগতে এই অগ্নিকাণ্ডত ৫০ জনৰো অধিক লোক আহত হোৱা বুলি সদৰী কৰিছে। এই বিধ্বংসী অগ্নিকাণ্ডৰ বিষয়ে অৱগত হোৱাৰ পিছতে অগ্নিনিৰ্বাপক বাহিনী আৰু জৰুৰীকালীন সেৱাৰ দল ঘটনাস্থলীত উপস্থিত হয়।
জৰুৰীকালীন ব্যৱস্থাপনা সেৱাই জানিবলৈ দিয়া মতে, ইতিমধ্যে জুই নিৰ্বাপন কৰা হৈছে। ঘটনাস্থলীত অনুসন্ধান তথা উদ্ধাৰ অভিযান অব্যাহত আছে বুলি সদৰী কৰি বিভাগীয় এগৰাকী বিষয়াই লগতে মৃতকৰ সংখ্যা বৃদ্ধি পোৱাৰ সম্ভাৱনা আছে বুলি আশংকা প্ৰকাশ কৰে।
অগ্নিকাণ্ডত ভস্মীভূত হোৱা অট্টালিকাটোত দুই শতাধিক লোক বাস কৰিছিল বুলি অনুমান কৰা হৈছে।স্থানীয় প্ৰশাসনৰ তথ্য অনুসৰি, এই অট্টালিকাটোত গৃহহীন লোকসকলে কোনো আনুষ্ঠানিক পট্টা চুক্তি অবিহনে থাকিব পৰাৰ ব্যৱস্থা আছিল।
এনে কাৰণত অট্টালিকাটোত অনুসন্ধান তথা উদ্ধাৰ অভিযানৰ ক্ষেত্ৰত কঠিনতা আহি পৰিছে বুলিও প্ৰশাসনিক কৰ্তৃপক্ষই লগতে কয়। অগ্নিকাণ্ডৰ কাৰণ আৰু ক্ষতিৰ পৰিমাণ এইপৰ্যন্ত প্ৰকাশ কৰা নাই কৰ্তৃপক্ষই।