যন্তৰ মন্তৰত প্ৰতিবাদকাৰীৰ মাজত শতাধিক হত্যাকাৰী আৰু ৬১ জন ধৰ্ষণত অভিযুক্ত! পোহৰলৈ আহিল ভয়ংকৰ তথ্য

কাৰোবাৰ বিৰুদ্ধে হত্যাৰ অভিযোগ, কাৰোবাৰ বিৰুদ্ধে আকৌ ধৰ্ষণৰ। কোনোবাজন পকচো গোচৰতো অভিযুক্ত। দিল্লীৰ যন্তৰ মন্তৰত ‘ককৰোচ জনতা পাৰ্টি’ৰ প্ৰতিবাদত হিংসা বিয়পোৱাৰ অভিযোগত দিল্লী আৰক্ষীয়ে ২৮৭৩ জন লোকক চিনাক্ত কৰিছিল। এতিয়া এই লোকসকলৰ বিৰুদ্ধে ভয়ংকৰ আৰু বিস্ফোৰক তথ্য পোহৰলৈ আহিছে।

দিল্লী আৰক্ষীৰ তথ্য অনুসৰি, যন্তৰ মন্তৰৰ এই প্ৰতিবাদত যে সমাজ বিৰোধী লোক সোমাই পৰিছিল, সেয়া এতিয়া সম্পূৰ্ণ পৰিষ্কাৰ হৈ পৰিছে। আৰক্ষীয়ে জনোৱা মতে, প্ৰতিবাদৰ সময়ত হিংসাত জড়িত থকা ২৮৭৩ জন লোকক মুখমণ্ডল চিনাক্তকৰণ ব্যৱস্থাৰ জৰিয়তে চিনাক্ত কৰা হৈছে। আৰক্ষীৰ সূত্ৰই প্ৰকাশ কৰা অনুসৰি, এই প্ৰতিবাদকাৰীসকলে নিজৰ লগত ছুৰী আৰু বিভিন্ন ধাৰাল অস্ত্ৰ লৈ আহিছিল আৰু তাৰেই তেওঁলোকে আৰক্ষীৰ ওপৰত আক্ৰমণ চলাইছিল।

পৰৱৰ্তী সময়ত আৰক্ষীয়ে এই প্ৰতিবাদকাৰীসকলৰ অতীতৰ অপৰাধৰ ইতিহাস পৰীক্ষা কৰাৰ পিছত আচৰিত ধৰণৰ তথ্য লাভ কৰে। আৰক্ষীৰ তথ্য অনুসৰি, চিনাক্ত হোৱা ২৮৭৩ জন প্ৰতিবাদকাৰীৰ ভিতৰত ৯৮৯ জনৰ নামত অতীতত কোনো নহয় কোনো অপৰাধত জড়িত থকাৰ ৰেকৰ্ড আছে। ইয়াৰে ১০১ জনৰ বিৰুদ্ধে হত্যাৰ অভিযোগ আৰু ৬২ জনৰ বিৰুদ্ধে হত্যাৰ চেষ্টাৰ অভিযোগ আছে। লগতে ৬১ জনৰ বিৰুদ্ধে ধৰ্ষণৰ আৰু ২৫ জনৰ বিৰুদ্ধে শ্লীলতাহানিৰ গোচৰ আছে। ইয়াৰ উপৰিও চুৰি আৰু ডকাইতিৰ দৰে গোচৰো বহুতো লোকৰ নামত আছে। এই তথ্য পোহৰলৈ অহাৰ পিছত স্বাভাৱিকতেই প্ৰতিবাদটোৰ আচল চৰিত্ৰক লৈ প্ৰশ্ন উত্থাপন হৈছে।

উল্লেখযোগ্য যে, নিট পৰীক্ষাৰ প্ৰশ্নকাকত ফাদিল হোৱাৰ প্ৰতিবাদত আৰু কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত দিল্লীৰ যন্তৰ মন্তৰত ‘ককৰোচ’সকলে এই প্ৰতিবাদ আৰম্ভ কৰিছিল। তেওঁলোকৰ বহুতো দাবী আছিল যদিও শিক্ষামন্ত্ৰীৰ পদত্যাগ আছিল প্ৰধান দাবী। এই কাৰ্যসূচীত পৰিৱেশকৰ্মী তথা শিক্ষাবিদ সোনম ৱাংচুকেও অংশগ্ৰহণ কৰিছিল। লাহে লাহে ৰাজধানীৰ বুকুত এই প্ৰতিবাদে এক ডাঙৰ বিদ্ৰোহৰ ৰূপ ধাৰণ কৰে। এনে পৰিস্থিতিত কেন্দ্ৰীয় চৰকাৰে আন্দোলনকাৰীসকলৰ সৰহভাগ দাবী মানি লয় আৰু শনিবাৰে শিক্ষামন্ত্ৰীগৰাকীয়ে পদত্যাগ কৰে। ইয়াৰ পিছতে প্ৰতিবাদকাৰীসকলে তেওঁলোকৰ আন্দোলন প্ৰত্যাহাৰ কৰে।